საპარლამენტო უმრავლესობის წევრი თინა ხიდაშელი სოციალურ ქსელ Facebook-ში წერს, მისი აზრით, რატომ არ უნდა გამოუცხადოს საქართველომ ბოიკოტი სოჭის 2014 წლის ზამთრის ოლიმპიადას. ხიდაშელის აზრით, ქვეყანამ გადაწყვეტილება ემოციურ ფონზე არ უნდა მიიღოს. დეპუტატი ფიქრობს, რომ ბოიკოტის შემთხვევაში, საქართველო მარტო დარჩება რუსეთის პირისპირ. განცხადებას უცვლელად გთავაზობთ.
"რატომ უნდა წავიდეთ სოჭში:
ერთი შეხედვით, მარტივი და უალტერნატივო გადაწყვეტილებაა - ბოიკოტი გამოვუცხადოთ სოჭის ოლიმპიურ თამაშებს.
წარმოიდგინეთ, საპრეზიდენტო კანდიდატი გიორგი მარგველაშვილი ჩადის დიცში, არის ბევრი დროშა, დიდი ტრიბუნა, ბევრი ადამიანი, და "აგვისტოს ომის გმირის" მიერ ოლიმპიური ჩირაღდნის აღმართვას პროტესტს უცხადებს. ხოლო პროტესტის ფორმა არც მეტი, არც ნაკლები - ოლიმპიადის ბოიკოტია. ბევრი შეძახილი, მქუხარე ტაში, ემოციები, ცრემლი, ათასი ეპითეტი გიორგის გმირობის და გამბედაობის შესახებ. სავარაუდოდ, გაზრდილი რეიტინგი.
სკეპტიკოსები იტყვიან - თავიდანვე რატომ არ გამოუცხადეთ ბოიკოტიო. მაგრამ მაინც კმაყოფილები დარჩებიან, საქციელს მოგვიწონებენ.
ერთი-ორი დღე ყველა ტელეეკრანიდან სჯა-ბაასის, ექსპერტული მოსაზრებების, ანალიზის, კრიტიკის, ცინიზმის, პატრიოტიზმის, ვაშა-ვაშას ან ვიშ-ვიშის სერიალი იქნება, შემდეგ, ეს ამბავი ყველას ისევე მიავიწყდება, როგორც სხვა მრავალი. მერე კიდევ ვინმე მფრინავი გამოჩნდება, ან მომღერალი, ანდაც რუსი შოვინისტი, ისევ გადავირევით, პატრიოტიზმი მოგვეძალება, გულზე მჯიღს დავიცემთ, ატყდება აურზაური და ასე მუდმივად.
არადა, თუ მცირე ხნით გვერდზე გადავდებთ ემოციებს, ურა-პატრიოტიზმს, მცირე ხნით თუ შევეცდებით სხვა რამეზეც ვიფიქროთ, გარდა იმ წუთიერი ემოციური კმაყოფილების, გაგვახსენდება, რომ გუშინ ვიღაც მფრინავმა, დიახ, ვიღაც მფრინავმა, ისე აგვაღელვა, რომ ხელისუფლებას მრავალჯერ გაცხადებული გადაწყვეტილების შეცვლა მოვთხოვეთ. ამ აღელვებაში კი დაგვავიწყდა, რომ ეს ოლიმპიადა ოკუპანტი სახელმწიფოს ტერიტორიაზე ტარდება, აფხაზეთიდან სულ რამდენიმე კილომეტრში, მას ვლადიმერ პუტინი გახსნის და მის გვერდით მსოფლიო ლიდერები იქნებიან. ეს "არა სოჭის ოლიმპიადას" კი, დღეს ძალიან არასერიოზულად და ჭეშმარიტად "გულის მოფხანად" გამოიყურება, რატომ გუშინ? რა იყო მთავარი არგუმენტები?
რუსეთი დაგვცინის! მათ ცინიზმს საზღვარი არა აქვს! ამ დაცინვას არ უნდა შევეგუოთ! და ა.შ.
მე კი, თუ ვიტყვი, რომ ეს სრულიად უადგილოა, რა თქმა უნდა, ფსიქიატრიულის ცნობას მომთხოვენ, ან უკეთეს შემთხვევაში იმას იტყვიან, რაც გუშინ ჩემი მეგობარი პაატა ზაქარეიშვილის მიმართ არ დაიშურეს და კიდევ ერთხელ შეახსენეს ერთმანეთს ამბავი ჩვენი ცნობილი მოღალატეობის შესახებ.
არადა, უადგილოა.
რუსეთს ჩემი სამშობლოს მნიშვნელოვანი ნაწილი ოკუპირებული აქვს, მეგობრებო, ოკუპირებული, ჩემს სამშობლოში რუსული დროშები ფრიალებს და რუსული ტანკები დგანან!!!
გახსოვს?!
რა დროს ცინიზმი და დაცინვაა, მათი ტანკები დგანან ჩვენს მიწაზე. ტანკები!
დიახ, იდეალური იქნებოდა საქართველოს ოკუპაციის გამო, მოსკოვის ოლიმპიადის გამეორება რომ შეიძლებოდეს, იდეალური და სწორი.
არ გამოვა. საქართველო მარტო დარჩება ამ ბოიკოტში, მისი პარტნიორების გარეშე, რუსეთის პირისპირ. მაშინ კი, დაცინვა საფუძვლიანი იქნება. სოჭის ბოიკოტს შეუძლია მთავარი იარაღი წაგვართვას რუსეთთან ურთიერთობაში. პირველად, ამ წლების მანძილზე, საქართველო დარჩება მარტო საკუთარ პროტესტსა და ბოიკოტში, თუმცა კი, გულში მჯიღდაცემული და კმაყოფილი. არჩევანი ჩვენზეა", - წერს ხიდაშელი.
