სტრასბურგში ვიზიტად მყოფმა ბიძინა ივანიშვილმა ჟურნალისტების კითხვებს გასცა პასუხი და NDI-ს კვლევასთან დაკავშირებით აღნიშნა, რომ ნაციონალური მოძრაობის რეიტინგი გამოქვეყნებულზე ორჯერ ნაკლებია.
"ორჯერ მაინც გადაუჭარბა ნაციონალურ მოძრაობას NDI-მ. 4%-ზე მეტი მაინც არ არის მაგათი რეიტინგი. ჩვენც ვატარებთ კვლევებს. ყოფილ სახელისუფლებო პარტიას არ აქვს 9% არცერთ შემთხვევაში. ეს NDI-მ დაუწერა", - განაცხადა ბიძინა ივანიშვილმა.
შეგახსენებთ, რომ დღეს, 22 აპრილს, ეროვნულ დემოკრატიულმა ინსტიტუტმა (NDI), სასტუმრო ქორთიარდ მარიოტში, საზოგადოებრივი აზრის კვლევის შედეგები წარმოადგინა.
კითხვაზე, ვის მისცემდით ხმას, ხვალ რომ ტარდებოდეს ადგილობრივი არჩევნები, 62%-ის პასუხი ქართული ოცნებაა, ხოლო 9%-ის - ნაციონალური მოძრაობა. მეორე არჩევანის შემთხვევაში გამოკითხულთა 2%-მა ქართული ოცნება, ხოლო 1%-მა ნაციონალური მოძრაობა დაასახელა.
კვლევა ქვეყნის მასშტაბით, 13-27 მარტის პერიოდში ჩატარდა და მის ფარგლებში შემთხვევითი შერჩევით 3,103 ადამიანი გამოიკითხა. კვლევის ცდომილება 2.5%-ს შეადგენდა. იგი კავკასიის კვლევითი რესურსების ცენტრმა ჩაატარა და შვედეთის განვითარების ფონდის მიერ არის დაფინანსებული. წინა კვლევა არასამთავრობო ორგანიზაციამ 2012 წლის ნოემბერში წარმოადგინა.
