ფეისბუქის გვერდზე ერთიანმა ნაციონალურმა მოძრაობამ შუალედური არჩევნებისთვის სამ რაიონში წარსადგენი მაჟორიტარი კანდიდატები დაასახელა.
თბილისში, ნაძალადევის რაიონში ერთიანი ნაციონალური მოძრაობის კანდიდატია ყოფილი სახელმწიფო მინისტრი დიასპორის საკითხებში მირზა (პაპუნა) დავითაია. სამტრედიაში მოსახლეობის მხარდაჭერის მოსაპოვებლად სამტრედიის საკრებულოს თავმჯდომარის მოადგილე ემზარ შუბლაძე იბრძოლებს, ხოლო ბაღდათის რაიონში - ბაღდათის საკრებულოს თავმჯდომარის მოადგილე ვლადიმერ წიქორიძე.
შეგახსენებთ, რომ საპარლამენტო არჩევნების შემდეგ რამდენიმე მაჟორიტარი კანდიდატი აღმასრულებელ ხელისუფლებაში სამუშაოდ გადავიდა, მათი ადგილები კი პარლამენტში გათავისუფლდა. ცესკო-მ შუალედური არჩევნები 2013 წლის 27 აპრილს დანიშნა. არჩევნები ნაძალადევის, ბაღდათისა და სამტრედიის საარჩევნო ოლქებში გაიმართება.
ცესკო-ში კანდიდატების დოკუმენტაციის წარდგენის ვადა 28 მარტს იწურება.