საქართველოს საგარეო საქმეთა მინისტრი, მაია ფანჯიკიძე, ევროპის სახალხო პარტიის მიერ გამოქვეყნებულ დეკლარაციას გამოეხმაურა.
''არა მგონია, სხვის მიერ შემოთავაზებული სამოქმედო გეგმა გვჭირდებოდეს მაშინ, როცა ინტენსიური ურთიერთობა გვაქვს ევროკავშირთან, ევროსაბჭოსთან, NATO-სა და აშშ-სთან'', - განაცხადა მაია ფანჯიკიძემ ჟურნალისტებთან საუბრისას.
ფანჯიკიძის თქმით, მან რეზოლუციაში ვერ ნახა ''ვერცერთი ფაქტი, რითაც ევროპის სახალხო პარტიის წევრები საკუთარ თეზისებს ამყარებენ''. მისივე თქმით, პრემიერმინისტრ ბიძინა ივანიშვილის მიერ ევროპის სახალხო პარტიისთვის გუშინ გაგზავნილი წერილი ძალიან დასაბუთებული იყო.
''ვფიქრობ, როცა ევროპელი პარლამენტარები ასეთ განცხადებებს აკეთებენ, კარგად უნდა იცნობდნენ ფაქტებს და თეზისებს, რომლებსაც თავიანთი განცხადებით სთავაზობენ საერთაშორისო საზოგადოებას, სწორედ ფაქტებით ამყარებდნენ. სამწუხაროდ, მათ რეზოლუციაში ასეთი ფაქტები არ მინახავს, მაშინ როცა ფაქტები ძალიან მნიშვნელოვანია და სწორედ ფაქტების მიხედვით უნდა მოქმედებდეს ყველა'', - განაცხადა მაია ფანჯიკიძემ.
შეგახსენებთ, ევროპის სახალხო პარტიამ დეკლარაცია გამოაქვეყნა, რომელშიც საქართველოს ხელისუფლებას, ქვეყნის ევროატლანტიკური ინტეგრაციის პროცესის განახლებისთვის სამოქმედო გეგმა შესთავაზა.
დეკლარაცია სამიტზე ევროპის სახალხო პარტიის ხელმძღვანელობამ განიხილა, რომლის შემადგენლობაში შედიან: ევროპის სახალხო პარტიის პრეზიდენტი, ევროპული კომისიის პრეზიდენტი, ათი ვიცეპრეზიდენტი, ასევე ირლანდიის მინისტრი ევროპულ საკითხებში, მას შემდეგ, რაც ირლანდია EPP-ს შემადგენლობაშია.
ევროპის სახალხო პარტიის ხელმძღვანელობის არცერთ წევრს, დეკლარაციის შესახებ საპირისპირო აზრი არ დაუფიქსირებია და მასზე ხელის მოწერისგან თავი არ შეუკავებია.
ევროპის სახალხო პარტია ევროპის პოლიტიკურ პარტიათა უდიდესი გაერთიანებაა, რომელიც 1976 წელს შეიქმნა და ევროპის მემარჯვენე-ცენტრისტული იდეოლოგიის ქრისტიან-დემოკრატიულ და კონსერვატიულ პარტიებს აერთიანებს.