ევროპის სახალხო პარტიამ დეკლარაცია გამოაქვყენა, რომელშიც ხელისუფლებას, ქვეყნის ევროატლანტიკური ინტეგრაციის პროცესის განახლებისთვის სამოქმედო გეგმა შესთავაზა.
ტაბულა კომენტარისთვის, საპარლამენტო უმცირესობის წევრს, გიორგი კანდელაკს დაუკავშირდა.
მისი შეფასებით, ევროპის სახალხო პარტიის დეკლარაცია არის პასუხი ''ბიძინა ივანიშვილის დიდაქტიკურ ესეზე, რომელიც მან შესთავაზა ათწლეულების გამოცდილების მქონე ლიდერებს''.
''ჩვენ ევროპაში არავინ არ გვექაჩება და არ გვაძალებს იქ შესვლას, ეს არის ქართველი ხალხის ისტორიული არჩევანი. თუ ჩვენთვის მათი ქცევის წესები და ფასეულობები არის მიუღებელი, არავინ არაფერს გვაძალებს'', - განაცხადა გიორგი კანდელაკმა.
დეპუტატის თქმით, აღნიშნული დეკლარაცია არის ''ყველაზე სერიოზული გაფრთხილება, რაც მთავრობას აქამდე მიუღია''.
''ეს დეკლარაცია მეტყველებს იმაზე, რომ თუ არ შეწყდება საქართველოში დემოკრატიული წყობილების ნგრევა, საქართველო მოწყდება ევროპას და აღმოჩნდება რუსეთის ხახაში, რაზეც პასუხისმგებლობა დაეკისრება ქართულ ოცნებას'', - აღნიშნა კანდელაკმა.
მისივე თქმით, სახალხო პარტიის მიერ შემოთავაზებული სამოქმედო გეგმა არ ითვალისწინებს დისკუსიას. ''ან მთავრობა ითვალისწინებს მას და საქართველო აგრძელებს ევროპისკენ სვლას, ან არა''.
ევროპის სახალხო პარტიის მიერ გამოქვეყნებულ დეკლარაციაში ნათქვამია, რომ 2012 წლის საპარლამენტო არჩევნების შემდეგ, ხელისუფლების მიერ გადაიდგა რამდენიმე ისეთი ნაბიჯი, ''რამაც დააზიანა ქვეყნის პოზიტიური იმიჯი კანონის უზენაესობის, სასამართლოსა და მედიის დამოუკიდებლობის საკითხებში''.
''ამდენად, არსებულ გარემოებებში და საქართველოსა და ევროკავშირს შორის ასოცირების ხელშეკრულების შესახებ მოლაპარაკების დასრულების შემდეგ, მისი ხელმოწერა და რატიფიკაცია ევროკავშირისა და მისი წევრის სახელმწიფოების მხრიდან საფრთხის ქვეშაა'', - აღნიშნულია დეკლარაციაში.
დეკლარაცია სამიტზე ევროპის სახალხო პარტიის ხელმძღვანელობამ განიხილა, რომლის შემადგენლობაში შედიან: ევროპის სახალხო პარტიის პრეზიდენტი, ევროპული კომისიის პრეზიდენტი, ათი ვიცეპრეზიდენტი, ასევე ირლანდიის მინისტრი ევროპულ საკითხებში, მას შემდეგ, რაც ირლანდია EPP-ს შემადგენლობაშია.
ევროპის სახალხო პარტიის ხელმძღვანელობის არცერთ წევრს, დეკლარაციის შესახებ საპირისპირო აზრი არ დაუფიქსირებია და მასზე ხელის მოწერისგან თავი არ შეუკავებია.
შეგახსენებთ, გუშინ, პრემიერმინისტრმა ბიძინა ივანიშვილმა, ევროპის სახალხო პარტიას წერილი მისწერა, რომელიც მისი Facebook-ის ოფიციალურ გვერდზე გამოქვეყნდა.