საქართველოს პრეზიდენტის პრესსპიკერის, მანანა მანჯგალაძის ცნობით, პრეზიდენტი პრემიერმინისტრს სთავაზობს, შეხვედრა ორშაბათს, დილით შედგეს. ამის შესახებ მანჯგალაძემ დღეს გამართულ ბრიფინგზე განაცხადა.
მანჯგალაძის განმარტებით, პრემიერთან შეხვედრა პრეზიდენტის ინიციატივა იყო და ''სრულიად გაუგებარია და უსაფუძვლო, რომ ამ შეხვედრის ჩაშლა პრეზიდენტს დაბრალდეს''.
"გუშინ საღამოს პრემიერმა გამოთქვა ინიციატივა შეხვედრა შემდგარიყო, რაც პრეზიდენტის განრიგიდან გამომდინარე ვერ მოხერხდა. ამიტომ პრეზიდენტის შეთავაზებაა, შეხვედრა შედგეს ორშაბათს დილით. აქვე ქვეყნის პირველი პირი საჯაროდ ადასტურებს, რომ მზად არის პრემიერს შეხვდეს იქ, სადაც მას სურს. დიახ, პრეზიდენტს აქვს რამდენიმე მნიშვნელოვანი ვიზიტი უცხოეთში, მაგრამ ბუნებრივია, ის ყოველთვის მზად არის ქვეყნის შიგნით მიმდინარე ყველა პროცესში მიიღოს აქტიური და კონსტრუქციული მონაწილეობა. ქვეყნის პირველი პირი ყველაფერს გააკეთებს, რათა მოლაპარაკებების პროცესი შედგეს პოლიტიკური კრიზისის განსამუხტად და მისი ინტერესია, შემდეგი კვირა დაიწყოს კონსტრუქციული დიალოგით და შეთანხმებით", - განაცხადა მანანა მანჯგალაძემ.
საქართველოს პრემიერმინისტრის პრესსამსახური, პრეზიდენტის შეთავაზებასთან დაკავშირებით, განცხადებას სავარაუდოდ დღის ბოლომდე გააკეთებს.
შეგახსენებთ, მთავრობის სხდომის დაწყებამდე, პრემიერმინისტრმა ბიძინა ივანიშვილმა პრეზიდენტთან შეხვედრასთან დაკავშირებით ისაუბრა და აღნიშნა, რომ სააკაშვილმა მასთან საუბარზე უარი თქვა. ივანიშვილის თქმით, უარის მიზეზად პრეზიდენტმა საზღვარგარეთ წასვლა დაასახელა.
