ვიმედოვნებთ, რომ თქვენ აირიდებთ იმ შეცდომებს, რომლებიც სხვა გარდამავალ ქვეყნებს ჰქონდათ, - ამის შესახებ ბულგარეთის საგარეო საქმეთა მინისტრმა ნიკოლაი მლადენოვმა, მაია ფანჯიკიძესთან შეხვედრის შემდეგ განაცხადა.
მისი შეფასებით, საქართველოს მოსახლეობა, მიუხედავად იმისა, თუ რომელ პარტიას უჭერს მხარს, ''ევროპული მომავლის ერთგულია''.
''დღეს აქ ვართ იმისთვის, რომ ახალი მთავრობის გეგმები მოვისმინოთ. სწორად გავიგოთ, როგორ ხედავენ ისინი პროცესის წარმართვას. არჩევნები ნამდვილად იყო პირველი მშვიდობიანი ხელისუფლების გადაცემის პროცესი ქვეყანაში. სწორი ნაბიჯი იქნება, ყურადღებით დავაკვირდეთ, თუ როგორი იქნება კონსოლიდირებული დემოკრატიული ინსტიტუტები საქართველოში, როგორ მოახერხებენ წარმართონ სწორად გარდამავალი პერიოდი საქართველოში. ის, რომ მიაწოდონ საქართველოს ის მომსახურება, რომელიც მათ სჭირდებათ - სამართლებრივი მიმართულება, ჯანდაცვა, განათლება და ის სექტორები, რომლებიც უმნიშვნელოვანესია ქვეყნისთვის - ეკონომიკური სტაბილურობა. ამის გარეშე ყველაფერი სხვა ნამდვილად უაზრობაა. ჩვენ ვართ ფაქტობრივად კარის მეზობლები. ბულგარეთი მნიშვნელოვანი სავაჭრო პარტნიორია საქართველოსთვის. ვიმედოვნებ, რომ თქვენ აირიდებთ იმ შეცდომებს, რომლებიც სხვა გარდამავალმა ქვეყნებმა ჩაიდინეს", - განაცხადა ნიკოლაი მლადენოვმა.
შეგახსენებთ, საქართველოში ვიზიტით იმყოფებიან შვედეთის საგარეო საქმეთა მინისტრი კარლ ბილდტი, ბულგარეთის საგარეო საქმეთა მინისტრი ნიკოლაი მლადენოვი და პოლონეთის პრეზიდენტის ადმინისტრაციის უფროსი იასეკ მიხალოვსკი.
მათ შეხვედრები გამართეს თავდაცვის მინისტრ ირაკლი ალასანიასთან და საგარეო საქმეთა მინისტრ მაია ფანჯიკიძესთან. სტუმრები სასტუმრო ქორთიარდ მარიოტში გამართულ დისკუსიასაც დაესწრებიან თემაზე - საქართველოს ევროპული მომავალი.
დიპლომატები გუშინ საქართველოს პრეზიდენტს, მიხეილ სააკაშვილს შეხვდნენ. შეხვედრას ასევე ესწრებოდა საქართველოში ევროკავშირის წარმომადგენელი ფილიპ დიმიტროვი.
