სოფელ წინწყაროში, სადაც რელიგიურ ნიადაგზე დაპირისპირება ერთი კვირაა მიმდინარეობს, სიტუაციის გასარკვევად ქართული ოცნების დეპუტატები, სოსო ჯაჭვლიანი და ვიქტორ ჯაფარიძე ჩავიდნენ.
კახეთის საინფორმაციო ცენტრის ინფორმაციით, წინწყაროში ჩასული დეპუტატები სოფლის ქრისტიანული მოსახლეობის ნაწილს შეხვდნენ. ერთ-ერთი მოქალაქის განცხადებაზე, სადაც ის ამბობს, რომ სოფლის ახალგაზრდები პარასკევს მუსლიმებს ლოცვის საშუალებას არ მისცემენ და ამას მსხვერპლი მოჰყვება, დეპუტატი ვიქტორ ჯაფარიძე აცხადებს: "გარდაუვალია ეგ".
მისივე განცხადებით: "უნდათ ვითომ, რომ მათი უფლებები არ დაირღვეს, მაგრამ ჩვენი უფლებებიც ხომ ირღვევა? მოსახლეობა დამშვიდდება იმ შემთხვევაში, თუ ისინი, ვინც ჯვარი მოჭრა, პასუხს აგებენ. რას ჰქვია ჯვარი მოჭრან, ამას სახელი არ ჰქვია. ეს არის ძველი ხელისუფლების ქმედება, რომ წყალი აამღვრიოს".
საუბარია რამდენიმე ჯვარზე, რომლებიც წინწყაროს ერთ-ერთი სასაფლაოს ჭიშკრიდან უცნობმა პირებმა ჩამოხსნეს. სოფლის რელიგიური უმცირესობის წარმომადგენლების განცხადებით, ამ სასაფლაოზე მუსლიმები იმარხებიან და გაურკვეველია, რატომ უნდა იყოს სოფლის სასაფლაოს ჭიშკარზე ქრისტიანული სიმბოლო, როცა სასაფლაო საერთოა ორი რელიგიის წარმომადგენლებისთვის.
ჯვრის ჩამოხსნასთან დაკავშირებით სოსო ჯაჭვლიანი აცხადებს: "დავასჯევინებთ ადამიანებს, ვინც გაბედა, იკადრა და ჯვარს ხელი ახლო. აქ თქვეს, არჩევნებამდე ყველაფერი კარგად იყოო და ეხლა ვისი ხელი ურევია და რა ხელი ურევია, სამართალი გაარკვევს. დღესვე შინაგან საქმეთა მინისტრს ვნახავთ და ყველაფერი დალაგდება".
ვიქტორ ჯაფარიძის განცხადებით კი: "თუ ლაპარაკია უფლებების დარღვევაზე, მოლა რომ ილოცებს დილის 6 საათზე, რატომ არ უშვებთ იმას, რომ დაირღვევა ქრისტიანების უფლებებიც? დილის 6 საათზე იქნებ არ უნდათ მოისმინონ მუსულმანების ლოცვა. სახლში ვისაც უნდა ილოცოს, სხვას ნუ შეაწუხებენ თავისი ქმედებით".
გუშინ მომხდართან დაკავშირებით სახალხო დამცველის აპარატმა მთავარი პროკურორის სახელზე მიმართვა გაავრცელა, სადაც მომხდარის შესწავლასა და რეაგირებას ითხოვს: "სოფლის ადგილობრივი მართლმადიდებელი მოსახლეობის ნაწილი აპროტესტებს მუსლიმი მოსახლეობის მხრიდან რელიგიური თავისუფლებით სარგებლობას, რის გამოც, მარად ღორჯომელაძეზე (მეჩეთის წინამძღვარი) რელიგიური ნიშნით ზეწოლას ახორციელებს. კერძოდ, 2012 წლის 29 ნოემბერს მარად ღორჯომელაძეს რელიგიურ ნიადაგზე სოფლის ადგილობრივი მოსახლეობა დაუპირისპირდა. მას მიაყენეს სიტყვიერი შეურაცხყოფა და დაემუქრნენ, რომ თუ არ შეწყვეტდა მეჩეთის მშენებლობას, დაუწვავდნენ სახლს და გააძევებდნენ სოფლიდან. ამასთან, განმცხადებლის განმარტებით, მისი ოჯახის მიმართ მუქარა დღემდე გრძელდება", - ნათქვამია მიმართვაში.
