საქართველოს მორაგბეთა ნაკრები ნოემბრის მეორე ტესტ-მატჩს 24 ნოემბერს, ფიჯის ნაკრების წინააღმდეგ გამართავს. შეგახსენებთ, რომ ბორჯღალოსნები უკვე ორი კვირაა მთავარი მწვრთნელის მილტონ ჰეიგისა და ლეგენდარული ახალზელანდიელი მორაგბეს ტანა უმაგას ხელმძღვანელობით ვარჯიშობენ. იაპონიასთან განცდილი მარცხის შემდეგ ნაკრების სამწვრთნელო შტაბმა ძირითად თხუთმეტეულში 3 ცვლილება განახორციელა: 5 ნომრად გიორგი ნემსაძის ნაცვლად კონსტანტინე მიქაუტაძე ითამაშებს. სათადარიგო სკამზე დასხდებიან შალვა მამუკაშვილი და დავით ზირაქაშვილი, რომელთა ნაცვლადაც ძირითად შემადგენლობაში ადგილი იური ნატრიაშვილმა და დავით ქუბრიაშვილმა დაიკავეს. შეხვედრა 15:00 სთ-ზე დაიწყება. საბედნიეროდ, ზირაქაშვილის ტრავმა, რომელიც მან იაპონიის ნაკრებთან მატჩში მიიღო, საგანგაშო არ აღმოჩნდა და შედეგად, იგი ინარჩუნებს შანსს, რომ შაბათს გარკვეული დრო მაინც დაჰყოს მოედანზე.
მატჩი საქართველოსა და ფიჯის ნაკრებებს შორის, 14 ნოემბერს, 15:00 სთ-ზე, მიხეილ მესხის სახელობის სტადიონზე გაიმართება.
