ბრიტანეთის პრინცი უილიამი და მისი მეუღლე, ქეით მიდლტონი, ჟურნალ Closer-ს პირადი ცხოვრების უფლებების დარღვევის გამო, სასამართლოში უჩივიან. მათი შეფასებით, წყვილის პიკანტური ფოტოების გამოქვეყნებით, ჟურნალი დაშვებულ ზღვარს გადასცდა.
ჟურნალის რედაქტორი, ლორანს პიო აცხადებს, აღნიშნული ფოტოების პუბლიკაციაში ვერაფერს ცუდს ვერ ხედავს და არ შეიძლება ამ ფოტოებს ,,შოკისმომგვრელი’’ ეწოდოს.
გამოცემის ცნობით, გასულ კვირას ფოტოსურათების დაბეჭდვა ბრიტანულ ჟურნალებსაც შესთავაზეს, თუმცა მათ წინადადებაზე უარი თქვეს.
შეგახსენებთ, რამდენიმე დღის წინ ფრანგულმა ჟურნალმა Closer, ბრიტანეთის დედოფლის, ელისაბედ მეორის შვილიშვილის პრინცი უილიამის და მისი მეუღლის სურათები გამოაქვეყნა, რომელთა ნაწილზეც ქეით მიდლტონი წელზევით შიშველ მდგომარეობაშია გამოსახული.
~
