ტაბულას მთავარმა რედაქტორმა, თამარ ჩერგოლეიშვილმა მაესტროს თვითრეგულირების ორგანოში 17 აგვისტოს საჩივარი შეიტანა, რომელშიც ტელეკომპანიას გადაცემა ”არგუმენტებში” მისი დამახინჯებული ფრაზის ამოღება და სამი დღის ვადაში ბოდიშის მოხდა მოსთხოვა.
”გთხოვთ: 1. დაუყოვნებლივ ამოიღოთ გადაცემა „არგუმენტების“ ანონსიდან ჩემი ფრაზა “მე ვარ კაი ტიპი, მე არაფრის მეშინია, თქვენ ყველანი მხდლები ხართ”; 2. სამი დღის ვადაში მოიხადოთ ბოდიში, აღიაროთ დარღვევა და წინამდებარე განცხადება სრულად წაიკითხოთ გადაცემა „არგუმენტების“ დაწყებისას. ხოლო შემდეგ, სრულად გაუშვათ 2012 წლის 2 აპრილის გადაცემაში ჩემს მიერ გამოთქმული აზრი,” ვკითხულობთ საჩივარში.
საჩივარი ეხება გადაცემა “არგუმენტების” ანონსს, რომელიც დღეში რამდენჯერმე გადაიცემა მაესტროს ეთერში და დამახინჯებულად წარმოაჩენს თამარ ჩერგოლეიშვილის მიერ გამოთქმულ აზრს ამავე გადაცემაში, რომელიც 2012 წლის 2 აპრილს გავიდა პირდაპირ ეთერში.
ტაბულას რედაქტორი “არგუმენტებში” აკრიტიკებს ირაკლი ალასანიას, რომელმაც, გადაცემამდე რამდენიმე დღით ადრე, ეროვნულ დემოკრატიული ინსტიტუტის მიერ 2012 წლის მარტში გამოქვეყნებულ კვლევას უნდობლობა გამოუცხადა, იმ მოტივით, რომ მოსახლეობა შეშინებულია და კვლევით ორგანიზაციებს სიმართლეს უმალავს.
“როდესაც შენ დგახარ და ტელევიზორიდან ხალხს ეუბნები, რომ მე იმიტომ ვერ ვიგებ შენს აზრს, რომ შენ ხარ შეშინებული - მე ვარ უშიში ვითარცა უხორცო, მე ვარ “კაი ტიპი”, მე არაფრის მეშინია, თქვენ კი ყველანი მხდლები ხართ… ამას იძახი. რატომ უნდა მომინდეს, ისეთ ადამიანს, რომელიც მე მშიშარად მთვლის და თავის თავს უპირატესად მიიჩნევს ხმა მივცე?” - ამბობს თამარ ჩერგოლეიშვილი.
გადაცემის ავტორებმა, ანონსისთვის ამოჭრეს მხოლოდ ერთი ფრაზა “მე ვარ კაი ტიპი, მე არაფრის მეშინია, თქვენ ყველანი მხდლები ხართ” - თითქოს თამარ ჩერგოლეიშვილი აყენებს მოსახლეობას იმ შეურაცხყოფას, რის გამოც ის კოალიცია “ქართული ოცნების” წევრს აკრიტიკებს. ტაბულას რედაქტორი მიიჩნევს, რომ ამ ქმედებით ტელეკომპანია მაესტრო შეგნებულად აყენებს მის რეპუტაციას ზიანს და უხეშად არღვევს მაუწყებელთა ქცევის კოდექსს, რომლის მე-14 მუხლის, მე-9 პუნქტი ნათლად უთითებს რომ:
“9. ინტერვიუების, ჩაწერილი მასალის, მათ შორის საარქივო მასალის რედაქტირებისას, მაუწყებელმა არ უნდა დაამახინჯოს რესპონდენტის ციტატა, ან არ უნდა მოახდინოს სხვა სახით აუდიტორიის შეცდომაში შეყვანა ვიზუალური ან აუდიო მანიპულაციებით, დასმული კითხვების მნიშვნელობის შეცვლით, ან კონტექსტიდან ამოვარდნილი კადრების გამოყენებით”
მაუწყებლობის შესახებ საქართველოს კანონის 52-ე მუხლის პირველი პუნქტის თანახმად მაუწყებლები ვალდებული არიან, მიიღონ ყველა ზომა პროგრამებში მოყვანილი ფაქტების ჯეროვანი სიზუსტის უზრუნველსაყოფად და დროულად შეასწორონ შეცდომები. ამავე მუხლის მე-2 პუნქტის თანახმად დაინტერესებულ პირს საწყისი განცხადების გაკეთებიდან, მათ შორის, ფაქტის მოყვანიდან, 10 დღის ვადაში უფლება აქვს მოსთხოვოს შესაბამის მაუწყებელს საწყის განცხადებაში მოცემული მცდარი ფაქტის თანაზომადი საშუალებებითა და ფორმით შესწორება ან უარყოფა საწყისი განცხადების ხანგრძლივობით და დაახლოებით იმ დროს, როდესაც გაკეთდა საწყისი განცხადება.
