რუსეთის უშიშროების საბჭოს მდივანი ნიკოლაი პატრუშევი სოხუმში დე ფაქტო პრეზიდენტს ალექსანდრ ანქვაბს შეხვდა, რის შემდეგაც სოხუმის სანაპიროზე გაისეირნა, შემდეგ ახალი ათონის მონასტერს ეწვია და გუდაუთაში დისლოცირებული რუსეთის მე-7-ე სამხედრო ბაზაც მოინახულა. ”ანქვაბთან შეხვედრაზე თანამშრომლობის მნიშვნელოვანი საკითხები განვიხილეთ , შედეგებით კმაყოფილი ვარ. ვისაუბრეთ იმაზე, ჩვენი სტრუქტურები როგორ უზრუნველყოფენ ერთობლივად აფხაზეთის უსაფრთხოებას“, – განაცხადა პატრუშევმა და დასძინა, რომ ამ მიმართულებით ახლო მომავალში ორმხრივი დოკუმენტების გაფორმება იგეგმება.
სოხუმში ჩასვლამდე პატრუშევმა გაზეთ ”არგუმენტი ი ფაქტი”-სთვის მიცემულ ინტერვიუში საქართველოს რუსეთში ტერორისტული აქტების განსახორციელებლად ადამიანების მომზადებაში დასდო ბრალი. ბრალდებას თბილისში უსაფუძვლო უწოდეს , აღნიშნეს , რომ მისი იგნორირება არ შეიძლება, მით უფრო იმის გათვალისწინებით, რომ რუსეთში შიდაპოლიტიკური ტემპერატურის აწევა ზრდის რისკებს და საფრთხეებს რუსეთის სამეზობლოში.
