რა იყო შენთვის მთავარი მოტივატორი იმისა, რასაც ბოლო დროს აკეთებ. საიდან მოდის მთავარი ინსპირაცია?
ჩემი მთავარი მოტივატორი არის ბიზნესი და ფული. ამისთვის კი პროდუქცია უნდა გავყიდო.
ანუ, მთავარია ფული?
ერთადერთი არ არის, რა თქმა უნდა. მაგალითად, ამას წინათ ჩემს პარტნიორთან ლევან მინდიაშვილთან ერთად ბუენოს აირესში გავაკეთე პროექტი, რომელსაც ერქვა ფერომონა. ეს წმინდა არტისტული პროექტი იყო, პერფორმანსი, სადაც მე კოსტიუმებზე ვიმუშავე. ფერომონები სეკრეციის ნივთიერებებია, რომლებიც ქიმიურ კომუნიკაციას უზრუნველყოფს მსგავს სახეობებში და ჩვენი ნამუშევრის კონცეფცია მაშინ ამ თემის ირგვლივ ტრიალებდა.
რა არის ის, რასაც ფეშენში აკეთებ. ეს ტანსაცმელია უფრო თუ პოეზია?
ორივეა. მაგრამ ამ ბოლო დროს უფრო იქამდე მივდივარ, რომ ეს ყველაფერი მაინც არის ორი რამ: ბიზნესი და ტანსაცმელი.
ქალებისთვის უფრო მუშაობ თუ კაცებისთვის?
ქალებისთვის. ქალები არიან მყიდველები და ფერადები. ისინი, ვისაც ტანსაცმელი ძალიან უყვარს და ვინც ყიდულობს.
ვიცი, რომ მუშაობდი ნიუ იორკის დაუნთაუნის თეატრებში, რა გაინტერესებდა იქ?
კონცეფცია, ვიზუალური მხარე, სილამაზე და ის, რომ ჩემი თავი გამომეხატა.
ამ მხრივ ყველაზე მეტად რომელი სპექტაკლი დაგამახსოვრდა?
ჟან ჟენეს პიესა იყო ძალიან საინტერესო, მედისინ შოუ თეატრში გავაკეთეთ.
ის მულტიმედია არტისტია, აკეთებს პერფორმანსს, სხვადასხვა მედიაში მუშაობს. ამითაცაა საინტერესო. ჩვენი საერთო ნამუშევარი სწორედ პერფორმანსი იყო.
თანამშრომლობა იმით გამოიხატებოდა, რომ შენ იყავი მისი კოსტიუმების დიზაინერი?
არა, არა, ეს ყველაფერი ჩვენი საერთო კონცეფცია იყო. მართალია, კოსტიუმები მე გავაკეთე, მაგრამ საერთოდ ყველაფერს ერთად ვაკეთებდით, მუსიკაც კი ჩემი შექმნილია და, საერთოდ, ფიზიკურად მე ავაწყე.
არის დღეს თბილისში ისეთი ვინმე, ვინც ინსპირაციას გაძლევს?
შაკო ნიკვა, საყურადღებო დიზაინერია ძალიან, დახვეწილია და ფორმით საინტერესო.
რითი არის შენთვის საინტერესო თბილისი და, მეორე მხრივ, ნიუ იორკი?
თბილისი არის ქალაქი, სადაც გავიზარდე და მყავს ძალიან ბევრი მეგობარი. ნიუ იორკში მაქვს აბსოლუტური თავისუფლება ყველანაირი ასპექტით და ვარ მარტო. ასე შუაში ვიხლიჩები, აქ არის ის, რაც იქ არ არის და პირიქით.
ალტერნატიულ მედიას თუ იყენებ ჩვენებების დროს?
გამომიყენებია, როგორ არა, მაგრამ, საუბედუროდ, ახლა არ მქონდა არც დრო და არც საშუალება, რომ ამაში ჩამედო რაღაც ენერგია. მომავალში აუცილებლად გამოვიყენებ მულტიმედიას, რომ სანახავადაც უკეთესი იყოს, ეს ძალიან მნიშვნელოვანია ჩემთვის.
მარტო მოდელებთან მუშაობ?
მირჩევნია, არ ვიმუშაო მოდელებთან და ვიმუშაო ხალხთან, რომელიც არის უფრო მოძრავი და საინტერესო – ვისაც მეტი რამის გაკეთება შეუძლია. ნიუ იორკში მყავს მსახიობები, რომლებიც მოძრაობენ, მღერიან. მაგრამ მოდელებიც ლამაზები არიან – ვარდებივით და ძალიან მომწონს.
დიდი ხნის წინ თბილისში იმართებოდა ავანგარდული მოდის ასამბლეა. ეს რაღაც ტრადიციაა, შენი კოსტიუმებიც რაღაც ამ ნიშაში ზის, ის არ არის მეინსტრიმი და არის უფრო ალტერნატიული.
ბოლო დროს მე მაინც უფრო ვცდილობ, რომ ისეთი კოსტიუმები გავაკეთო, რაც შეიძლება ყოველდღიურად ჩაიცვა. მე გავყავი ჩემი შემოქმედება და ეს მხატვრული მხარე. ავანგარდი რაც არის, პერფორმანსში და ინსტალაციებში გადავიტანე, ჩემი შემოქმედება მხატვრულ მხარედ და ბიზნესად გავყავი.
ბუტიკებში აბარებ შენს ტანსაცმელს ნიუ იორკში?
კი, სოჰოში ვყიდი, არის ერთი ადგილი, სოჰო მარკეტ პლეისი და რამდენიმე ინტერნეტსაიტზე.
ის, რაც თბილისში ავანგარდული მოდის ასამბლეაზე კეთდებოდა, ნიუ იორკში თუ არსებობს?
ნიუ იორკში არ არის. ავანგარდული მოდის ჩვენებები არის კანადაში, ტორონტოში. ნიუ იორკში მოდა დიდი ფულის კეთების ადგილი და სერიოზული კომერციაა. ამერიკაში მოდა არ არის უბრალოდ ხელოვნება, ის ძალიან მდიდარი ბიზნესია.
შენი უახლოესი გეგმები როგორია?
ნიუ იორკში რამდენიმე სპექტაკლი მაქვს და ფანჯრების დიზაინის შეკვეთაც. მინდა, ლევანთან ერთად სერიოზულად ავაწყო ჩვენი ლეიბლი არგენტინაში და რაღაც კულტურული ივენთის გაკეთებასაც ვაპირებთ.
