მოსკოვში პოლიციის გაძლიერებული შემადგენლობა მობილიზებულია მოედანთან, სადაც 2 საათზე საპროტესტო მიტინგი უნდა დაიწყოს. უსაფრთხოების ზომები გამკაცრებულია მოედნის მიმდებარე რაიონებშიც. ქუჩებში გამოყვანილია შინაგანი ძალების წარმომადგენლებით სავსე ავტობუსები და სატვირთო მანქანები. აქცია ლოზუნგით ”სამართლიანი არჩევნებისთვის!” დღეს , რუსეთის სხვა და სხვა ქალაქებში იმართება, რასთან დაკავშირებითაც სხვა და სხვა ქალაქებიდან ვრცელდება ინფორმაცია დაკავებულების შესახებ. რაც შეეხება მოსკოვს, გავრცელებული ცნობებით, სოციალურ ქსელებში 50 000 -კაცზე მეტმა გამოთქვა მიტინგზე მისვლის სურვილი.
რუსეთის ქალაქ ულიანოვსკში დააკავეს "იაბლოკოს" ადგილობრივი ახალგაზრდული ორგანიზაციის ლიდერი ვიაჩესლავ ემელიანოვი. მას სამართალდამცველებმა ვანდალიზში დასდეს ბრალი , ადამიანებისთვის საპროტესტო აქციაში მონაწილეობის მოწოდების გამო.
ნოვოსიბირსკში არჩევნების ფალსიფიკაციის წინააღმდეგ საპროტესტო აქციაში დაახლოებით 3000 პირი იღებს მონაწილეობას.
პოლიციამ ხაბაროვსკში დაახლოებით 60 კაციანი აქციის 40-ამდე მონაწილე დააკავა. ცნობას სააგენტო რია-ნოვოსტი ავრცელებს
სანქცირებული საპროტესტო აქცია მიმდინარეობს ვორონეჟშიც, სააგენტო ინტერფაქსის ცნობით , მასში რამდენიმე ასეული რუსეთის მოქალაქე მონაწილეობს, ისინი არჩევნების შედეგების გადახედვას მოითხოვენ.
ასევე, რამდენიმე ასეული ადამიანი დღეს ქუჩაში გამოვიდა რუსეთის ქალაქ პენზაში. აქციები მიმდინარეობს ვლადივასტოკში, როსტოვში და სხვა ქალაქებში