პარტია ფედერალისტები BBC-ის გამოძიებას გამოეხმაურა, რომლის მიხედვითაც, ოცნებამ აქციების დასაშლელად პირველი მსოფლიო ომის დროინდელი მსოფლიო იარაღი გამოიყენა.
პარტიის განცხადებით, ამ გამოძიებამ ივანიშვილის რეჟიმს უმძიმესი ბრალდება წაუყენა.
ფედერალისტები საერთაშორისო გამოძიებას ითხოვენ და მიმართავენ მოქალაქეებს, მიაწოდონ ისეთი ინფორმაცია, როგორიცაა - სამედიცინო ცნობები (დიაგნოზი, ტოქსიკოლოგიური ანალიზი), ფოტო/ვიდეო მასალა დაზიანებებზე, ინფორმაცია სიმპტომების შესახებ (სუნთქვის გართულება, დამწვრობა, ნევროლოგიური ნიშნები) გამოყენებული ჭურვების ფოტოები, რათა ეს მტკიცებულებები გაუზიარონ საერთაშორისო ინსტიტუტებს.
"ამ გამოძიების მიხედვით, რეჟიმი ძალაუფლების შესანარჩუნებლად არა მხოლოდ საქართველოს დემოუკიდებლობას თმობს, არამედ საქართველოს მოსახლეობას აკრძალული ქიმიური იარაღით უსწორდება და ქრონიკული დაავადებებისთვის წირავს.
სახელმწიფოში, სადაც ყველა ინსტიტუტი ერთ კაცს ემორჩილება, ქიმიური იარაღის გამოყენების ფაქტის მიუკერძოებელ სამართლებრივ გამოძიებაზე, ცხადია, საუბარი ზედმეტია. ეს რეჟიმი რომ მინიმალურ ანგარიშვალდებულებას გრძნობდეს საზოგადოების წინაშე და რაც მთავარია, ამ უმძიმესი ბრალდების განეიტრალება უნდოდეს - თავად მოიწვევდა საერთაშორისო მისიას ამ ამბის გამოსაძიებლად.
ეს ფაქტი აუცილებლად იქნება გამოძიებული რეჟიმის ცვლილების შემდეგ საპარლამენტო კომისიის, ხოლო შემდეგ დამოუკიდებელი მართლმსაჯულების მეირ.
რეჟიმის ცვლილებამდე, ჩვენ ვითხოვთ საერთაშორისო გამოძიებას.
იმისთვის, რომ საერთაშორისო გამოძიებას დავეხმაროთ და მომავალში დაზარალებულების მიმართ შესაბამისი ზომები გავატაროთ, გვჭირდება ინფორმაცია.
მივმართავთ სამედიცინო პერსონალსაც - ნუ გახდებით დანაშაულის თანამონაწილე დუმილით. ანონიმურად მოგვაწოდეთ ინფორმაცია იმ პაციენტების შესახებ, რომლებსაც აღენიშნებათ არადამახასიათებელი ქიმიური მოწამვლის ნიშნები.
ჩვენ ვიმუშავებთ უცხოელ ტოქსიკოლოგებთან და უფლებადამცველებთან. თუ ხართ ექიმი და გაქვთ წვდომა ლაბორატორიულ მონაცემებზე, რომელიც ადასტურებს უცნობი ქიმიური ნაერთების არსებობას პაციენტების სისხლში, მოგვაწოდეთ ეს ინფორმაცია. ჩვენ პარტნიორებთან ერთად უზრუნველვყოფთ ნიმუშების გადაგზავნას ევროპის წამყვან ლაბორატორიებში.
ჩვენი მიზანია, ეს მტკიცებულებები მივაწოდოთ საერთაშორისო ინსტიტუტებს, იმისათვის რომ დადგინდეს ჭეშმარიტება და როდესაც ეს მოხდება ივანიშვილის რეჟიმს სანქციები დაუმძიმდეს.
ამიტომ, ყველას გთხოვთ, რომ მოგვმართოთ ფედერალისტების და თავისუფლების ინსტიტუტის ცხელ ხაზზე (0 32 2 420 737) იმისათვის, რომ დავიწყოთ მასალის მოგროვება საერთაშორისო გამოძიებისთვის. ვისაც ღია არხის გამოყენება არ გსურთ, უსაფრთხო არხით დაგვიკავშირდით, ჩვენი პოვნა იოლია.
კონსულტაციებს ვიწყებთ დემოკრატიული პარტიებთან და ექსპერტებთან ძალისხმევის გასაერთიანებლად
ქიმიური იარაღის გამოყენება საკუთარი მოსახლეობის წინააღმდეგ, საერთაშორისო სანქციების საფუძველია. თუ დადასტურდა, რეჟიმის ცვლილების შემდეგ ყველა დაზარალებული მიიღებს კომპენსაციას." - წერია განცხადებაში.
