გამოცემა Reuters საკუთარ გამოთვლებზე დაყრდნობით წერს, რომ უკრაინული დრონების თავდასხმებმა და დაგეგმილმა მასშტაბურმა სარემონტო სამუშაოებმა აგვისტოში რუსეთის ნავთობის გადამუშავების შესაძლებლობა რეკორდულად დაბალ მაჩვენებლებამდე მიიყვანა.
გამოცემა წერს, რომ ამ თვეში უკრაინამ რუსეთის ნავთობგადამამუშავებელ ქარხნებსა და საექსპორტო ინფრასტრუქტურაზე დრონებით თავდასხმები გააძლიერა, რითიც რუსეთის უდიდეს ფინანსურ წყაროს დაარტყა.
Reuters-ის გამოთვლების მიხედვით, ამ თვეში სხვადასხვა ქარხანაზე დრონებით თავდასხმებმა 3.1 მილიონი ტონა ნავთობის გადამუშავების სიმძლავრე გააჩერა, რაც საერთო ზეგავლენის 48%-ს შეადგენს. გამოცემა ასევე ხაზს უსვამს გასულ თვეებში დაზიანებული ქარხნებისთვის დაგეგმილ სარემონტო სამუშაოებს, რომლებმაც ასევე გამოიწვიეს რუსეთის ნავთობის გადამუშავების სიმძლავრის ვარდნა.
გამოცემის ცნობით, უკრაინულმა თავდასხმებმა აგვისტოში რუსეთის გადამამუშავებელი სიმძლავრის დაახლოებით 17% (დღეში 1.2 მილიონი ბარელი) გააჩერა.
გამოცემა აღნიშნავს, რომ ეს მაჩვენებელი კოვიდ-პანდემიის დროს, 2020 წლის მაისში დაფიქსირებულ პიკსა და 2022 წლის მაისის მაჩვენებელს აღემატება, როცა უკრაინაში რუსეთის შეჭრის შემდეგ წარმოება შეჩერდა. ეს მაჩვენებელი ასევე 54%-ით მეტია ივლისის მაჩვენებელთან შედარებით.
მანამდე, Reuters ინფორმირებულ პირებზე დაყრდნობით წერდა, რომ ნავთობგადამამუშავებელი ქარხნების შეჩერების გამო რუსეთმა აგვისტოში ნედლი ნავთობის საექსპორტო გეგმა 200,000 ბარელით გაზარდა.
გამოცემა აღნიშნავს, რომ თავდასხმები იმ პერიოდს დაემთხვა, როდესაც რუსეთში სეზონური მოთხოვნა ბენზინზე ტურისტებისა და ფერმერების მხრიდან პიკს აღწევს. ივლისში მოსკოვმა შიდა მიწოდების უზრუნველსაყოფად ბენზინის ექსპორტის აკრძალვა გაამკაცრა.
