საქართველოს პროკურატურა თბილისის საქალაქო სასამართლოს მიერ თედო აბრამოვისთვის გამოტანილ გამამართლებელ განაჩენს, რომლითაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვისათვის ბრალდებული თედო აბრამოვი უდანაშაულოდ იქნა ცნობილი, სააპელაციოში გაასაჩივრებს.
"სამართალდამცველებმა ბრალდებული 2024 წლის 7 დეკემბერს დააკავეს.
მას ბრალდება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე წარედგინა.
შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა უკანონოდ შეიძინა და ინახავდა ნარკოტიკულ საშუალება "მდმა" (3,4 - მეთილენდიოქსიმეტაფეტამინი) წონით 4,41548 გრამს.
სისხლის სამართლის საქმეზე მოპოვებული მტკიცებულებები სრულად იქნა გამოკვლეული თბილისის საქალაქო სასამართლოში.
მიუხედავად ამისა, სასამართლომ არ გაიზიარა ბრალდების მხარის მიერ გამოკვლეული მტკიცებულებები, ბრალდებული უდანაშაულოდ ცნო წარდგენილ ბრალდებაში და პატიმრობიდან გაათავისუფლა. საქართველოს პროკურატურა თბილისის საქალაქო სასამართლოს განაჩენს, სამოტივაციო ნაწილის ჩაბარების შემდეგ, კანონით დადგენილ ვადაში თბილისის სააპელაციო სასამართლოში გაასაჩივრებს". - წერს პროკურატურა.
აქციების დროს ნარკოდანაშაულის ბრალდებით დაკავებული 22 წლის თედო აბრამოვი მოსამართლე თამარ მჭედლიშვილმა 15 აგვისტოს უდანაშაულოდ ცნო.
