გაზპრომი კომპანიის სათავო ოფისში მომუშავე თანამშრომლების 40%-ის გათავისუფლებას გეგმავს

რუსეთის სახელმწიფო კომპანია Gazprom კომპანიის სათავო ოფისში მომუშავე თანამშრომლების 40%-ის გათავისუფლებას გეგმავს. შემცირების შესახებ ინფორმაცია მედიას კომპანიის პრესსპიკერმა დაუდასტურა.

რუსული პროპაგანდისტული მედიის ცნობით, 23 დეკემბერს კომპანიის დირექტორთა საბჭოს ვიცეპრეზიდენტმა, ელენა ილიუხინამ ხელმძღვანელს, ალექსეი მილერს გაუგზავნა წერილი, Gazprom-ის ცენტრალურ ოფისში კადრების დაახლოებით 40%-ით, 4 100-დან 2 500-მდე შემცირებასთან დაკავშირებით.

ამასთან, წერილში აღნიშნულია ისიც, რომ კომპანიის ამ განყოფილების ხელფასების ბიუჯეტი 50 მილიარდ რუბლს ($488 მილიონს) აღწევდა.

აღსანიშნავია, რომ კომპანიაში შემცირებების შესახებ ინფორმაცია უკრაინის მიერ რუსული გაზის ტრანზიტის შეჩერებიდან ორი კვირის შემდეგ გავრცელდა.

კომპანიის მონაცემებით, უკრაინაში მიმდინარე ომის ფონზე, Gazprom-მა 2023 წელს 1999 წლის შემდეგ პირველად, წელი $7-მილიარდიანი ზარალით დაასრულა.