რუსეთის საგარეო საქმეთა სამინისტრო ოკუპირებულ აფხაზეთში მიმდინარე აქციების ფონზე რუსეთის მოქალაქეებს მოუწოდებს, რომ იქ მგზავრობისგან თავი შეიკავონ, თვითგამოცხადებულ რესპუბლიკაში დარჩენილ რუსებს კი ურჩევს, რომ სიფრთხილე გამოიჩინონ, "არეულობის წერტილებს არ მიუახლოვდნენ და, შესაძლებლობის შემთხვევაში, ქვეყანა დატოვონ".
ამის შესახებ რუსეთის საგარეო საქმეთა სამინისტროს ოფიციალური წარმომადგენელი, მარია ზახაროვა განცხადებას აქვეყნებს.
"რუსეთში შეშფოთებით აკვირდებიან მეზობლად მიმდინარე მოვლენებს ჩვენთვის მეგობრულ აფხაზეთში, სადაც შიდაპოლიტიკური წინააღმდეგობები კვლავ გამწვავდა. ოპოზიციურმა ძალებმა, სამწუხაროდ, ქვეყნის კანონიერ ხელისუფლებასთან უთანხმოების ცივილიზებული, ურთიერთპატივისცემაზე დაფუძნებული დიალოგის გზით რეგულირება შეუძლებლად ჩათვალეს და კანონიერების ჩარჩოდან გამოვიდნენ, რითაც კონფლიქტის ესკალაცია გამოიწვიეს. შედეგად, რესპუბლიკაში კრიზისული ვითარება დადგა და ეს, მიუხედავად მისი მომავალი დასასრულისა, აფხაზეთის განვითარებას აჩერებს. კერძოდ, ცხადია, რომ ახლანდელის მსგავსი სცენარები არანაირად არ უწყობს ხელს საგარეო ინვესტიციების მიზიდვას, რაც რესპუბლიკის სოციალურ-ეკონომიკური ამაღლებისთვის წონიანი ფაქტორია.
რუსული მხარე აფხაზეთის შიდა პროცესებში არ ერევა და იმედოვნებს, რომ წარმოქმნილი ვითარება მხოლოდ მშვიდობიანი პოლიტიკური გზით იქნება დარეგულირებული. ამასთან, რა თქმა უნდა, აფხაზეთის კანონები საგულდაგულოდ უნდა იყოს დაცული, მათ შორის, საზოგადოებრივი წესრიგის დაცვის მხრივ.
შექმნილ ვითარებაში რუსეთის საგარეო საქმეთა სამინისტრო იძულებულია, რუსეთის მოქალაქეებს ურჩიოს, რომ თავი შეიკავონ აფხაზეთში მგზავრობისგან, მათ შორის, ტურისტული მიზნებითაც. მნიშვნელოვანია, რომ იმ რუსებმა, რომლებიც ამ სახელმწიფოში დროებითი იმყოფებიან, გაძლიერებული დაკვირვებულობა გამოავლინონ, არეულობის წერტილებს არ მიუახლოვდნენ და, შესაძლებლობის შემთხვევაში, ქვეყანა დატოვონ". - წერია განცხადებაში.
მანამდე, სოხუმში მომიტინგეები თვითგამოცხადებული რესპუბლიკის პარლამენტის შენობის ეზოში შეიჭრნენ და შენობას ალყა შემოარტყეს.
ადგილობრივი მედიის ინფორმაციით, მომიტინგეების ეზოში შეჭრამდე ცოტა ხნით ადრე შენობა დატოვა თვითგამოცხადებულმა რესპუბლიკის ე.წ. პრეზიდენტმა ასლან ბჟანიამ.
აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი.
11 ნოემბერს ე.წ. ოპოზიციის ლიდერები დააკავეს, მარიონეტული რეჟიმი აცხადებდა, რომ "მათ ჩაიდინეს კანონსაწინააღმდეგო ქმედებები პარლამენტის ერთ-ერთი დეპუტატის მიმართ". საუბარია, ალმას აქაბაზე.
ოპოზიციონერების დაკავებას სოხუმში საპროტესტო აქციები მოჰყვა, მომიტინგეებმა ჩაკეტეს სოხუმისკენ მიმავალი სამივე ხიდი – კოდორის, გუმისთისა და ქვემო გუმისთის ხიდები. დაკავებულების გათავისუფლების შემდეგ კი მომიტინგეებმა გუმისთის ხიდი გახსნეს, რომელზეც ოკუპირებული რეგიონის ცენტრალური გზატკეცილი გადის.
საპროტესტო აქციების ფონზე აფხაზეთის თვითგამოცხადებულმა ხელისუფლებამ ოპოზიციის წარმომადგენლები გაათავისუფლა.
ოკუპირებული აფხაზეთის ოპოზიციური პარტიის, სახალხო ერთობის ფორუმის ერთ-ერთი ლიდერის, ასლან ბარციცის თქმით, დაკავების დროს მისი კოლეგები გუდაუთიდან ბრუნდებოდნენ, სადაც მოქალაქეებს შეხვდნენ და რუსეთსა და აფხაზეთს შორის ხელმოწერილი შეთანხმებაზე ისაუბრეს.
აფხაზური ოპოზიცია რუსულ-აფხაზური საინვესტიციო ხელშეკრულების რატიფიცირებას ეწინააღმდეგება და განხილვის პარალელურად, 15 ნოემბერს დე ფაქტო პარლამენტთან საპროტესტო აქციის გამართვას გეგმავდა.
"რუსეთის იურიდიული პირების მიერ აფხაზეთის რესპუბლიკის ტერიტორიაზე საინვესტიციო პროექტების განხორციელებასთან" დაკავშირებული კანონის მიზანი მარიონეტული რეჟიმის განმარტებით, "საინვესტიციო პროექტების მხარდაჭერა, ეკონომიკის შემდგომი განვითარება და მოქალაქეების მდგომარეობის გაუმჯობესებაა".
ოპოზიციის წარმომადგენლები კი ხაზს უსვამენ, რომ კანონპროექტი რუს ინვესტორებს პრივილეგიებს აძლევს, მათ შორის, განსაზღვრული დროით ათავისუფლებს დღგ-სგან, აძლევს ე.წ. საბაჟო გადასახადის გარეშე მუშაობის საშუალებას და ითვალისწინებს, ოკუპირებულ რეგიონში რუსული ბანკის გახსნას, რომლითაც საინვესტიციო თანხები იმოძრავებს.
ამასთან, კანონპროექტის მიღების წინ დე ფაქტო პარლამენტმა "მრავალფუნქციური კომპლექსების სამართლებრივი სტატუსის მოწესრიგების შესახებ" მომზადებული საკანონმდებლო ინიციატივა ორი მოსმენით უკვე მიიღო. ოპოზიციის წარმომადგენლების შეფასებით, მარიონეტული რეჟიმი ცდილობს "მრავალფუნქციური ცენტრების მშენებლობის" შესახებ ჩანაწერით, დააკანონოს ივლისში გაწვეული "აპარტამენტების კანონი", რომელიც, მათ შორის, რუსეთის მოქალაქეებისთვის უძრავი ქონების მიყიდვის უფლებას მოიცავდა.
