საპარლამენტო უმრავლესობის წევრის გივი მიქანაძის მტკიცებით, "ბოლო დღეების განმავლობაში, ოპოზიცია და მათთან დაკავშირებული სუბიექტები გადავიდნენ რადიკალურ ქმედებებზე, რაც გამოიხატება წინასაარჩევნო კამპანიაში პირდაპირ ხელის შეშლის კონტექსტში". მან ბრიფინგზე თქვა, რომ ეს განსაკუთრებით ეხება ქართული ოცნების კუთვნილი წინასაარჩევნო ბანერების დაზიანებას და საარჩევნო რგოლების არგაშვებას. მიქანაძე ირწმუნება, რომ ქართული ოცნების წინასაარჩევნო კამპანიისთვის ხელის შეშლას "სისტემატური ხასიათი აქვს წინასაარჩევნო პერიოდის დაწყებიდან".
"მიუხედავად არაერთი მოწოდებისა, გრძელდება ადგილობრივი სადამკვირვებლო ორგანიზაციების მიერ ქართული ოცნების წინააღმდეგ წარმოდგენილი დარღვევების იგნორირება. მოვითხოვთ ადგილობრივი სადამკვირვებლო ორგანიზაციებისგან, ასახონ თავის შუალედურ თუ შემაჯამებელ ანგარიშებში ის მრავლობითი წინასაარჩევნო დარღვევა, რომელიც ჩვენ გავასაჯაროეთ და ასახულია ქართული ოცნების ფეისბუქ გვერდზე ატვირთულ ანგარიშებში.
ასევე მივმართავთ საერთაშორისო სადამკვირვებლო ორგანიზაციებს, საკუთარ ანგარიშებში ასახონ და სათანადოდ შეაფასონ ადგილობრივი სადამკვირვებლო ორგანიზაციების მხრიდან ჩვენს წინააღმდეგ განხორციელებული საარჩევნო დარღვევების იგნორირება" - განაცხადა მიქანაძემ.
ქართული ოცნების მტკიცებით, გუშინ, 16 ოქტომბერს, ხელვაჩაურის მუნიციპალიტეტის, სოფელ სარფში, ერთიანი ნაციონალური მოძრაობის ხელვაჩაურის საკრებულოს წევრმა, მამუკა ჯევაიშმა თანმხლებ პირებთან ერთად დააზიანა ქართული ოცნების ორი საარჩევნო ბილბორდი.
"ქართული ოცნების ხელვაჩაურის შტაბმა შეტყობინება გადასცა 112-ს, რის საფუძველზეც დაიწყო გამოძიება სხვისი ნივთის დაზიანების ფაქტზე.
15 ოქტომბერს, ქალაქ ქუთაისში, ერთიანი ნაციონალური მოძრაობის“ ლიდერებმა, ხატია დეკანოიძემ და გიგი უგულავამ ქართული ოცნების წინასაარჩევნო ბილბორდები დააზიანეს, რაც ცალსახად სხვისი ნივთის დაზიანებას წარმოადგენს.
5 ოქტომბერს, ჩუღურეთის რაიონში, მამარდაშვილის ქუჩა ნომერ 12-ში, ლელოს აქტივისტმა, სალომე ტიმჩენკომ ცეცხლი წაუკიდა ქართული ოცნების სიმბოლიკას. დაწვა ქართული ოცნების დროშა.
8 სექტემბერს, აეროპორტის დასახლებაში პარტია ახალის აქტივისტებმა, პარტიის ლიდერების, მაია კოპალეიშვილისა და ანა გოგოლაძის ხელმძღვანელობით დახიეს მმართველი გუნდის გაკრული პლაკატები.
სექტემბრის დასაწყისში ოპოზიციის აქტივისტებმა საბურთალოზე, ვარკეთილში, ნაძალადევსა და დიდუბეში არაერთგზის გადააკრეს, ჩამოხიეს და დააზიანეს ქართული ოცნების პლაკატები.
საზოგადოებას ასევე შევახსენებთ, რომ ხაზარაძის, გვარამიასა და კეზერაშვილის კუთვნილმა ტელევიზიებმა: მთავარმა არხმა, ტვ პირველმა და ფორმულამ კომუნიკაციების კომისიისა და სასამართლო გადაწყვეტილების მიუხედავად, დღეის ჩათვლით არ გაუშვეს ქართული ოცნების სარეკლამო რგოლების ნაწილი, რითაც საერთო ჯამში ხუთ საათზე მეტი დროით უფასო სარეკლამო ზიანი მოგვაყენეს" - აცხადებს გივი მიქანაძე.
