მოლდოვაში 20 ოქტომბრის არჩევნებისა და რეფერენდუმის წინ კომპანია Meta-მ ყალბი ანგარიშების ქსელი გააუქმა, რომლის სამიზნე აუდიტორია მოლდოვაში რუსულენოვანი მოსახლეობა იყო.
მომდევნო კვირას, 20 ოქტომბერს, ქვეყანაში საპრეზიდენტო არჩევნები და ევროკავშირში გაწევრიანების შესახებ რეფერენდუმი იგეგმება.
Meta-ს ცნობით, ყალბი ანგარიშები მოლდოვის პრეზიდენტ მაია სანდუს, EU-ს მხარდამჭერ პოლიტიკოსებსა და რუმინეთსა და მოლდოვას შორის ახლო ბმებს აკრიტიკებდნენ, მხარს კი პრორუსულ პარტიებს უჭერდნენ.
კომპანია ამბობს, რომ "კოორდინირებული არაავთენტური ქცევის" შესახებ მათი პოლიტიკის დარღვევისთვის 7 Facebook-ის ანგარიში, 23 გვერდი, ერთი ჯგუფი და 20 Instagram-ის ანგარიში გააუქმეს.
Meta-ს თქმით, 23 ყალბი გვერდიდან დაახლოებით 4 200 ანგარიშს ჰქონდა ერთი ან მეტი მათგანი გამოწერილი, Instagram-ის ანგარიშებიდან ერთი ან მეტი კი დაახლოებით 335 000 მომხმარებელს ჰქონდა გამოწერილი.
ამასთან, მოლდოვის ხელისუფლების თქმით, ათობით ტელეგრამ-არხი და ბოტი დაბლოკეს, რომლებიც ამომრჩევლების მოსყიდვას ემსახურებოდა.
მომხმარებლებს აცნობეს, რომ არხები პოლიტიკური პარტიების დაფინანსების შესახებ "ადგილობრივ კანონს არღვევდნენ".
მოლდოვის ეროვნული გამოძიების ინსპექტორატმა თქვა, რომ ტელეგრამზე 15 არხი და 95 ბოტი დაბლოკეს, რომლებიც ამომრჩევლებს ფულს სთავაზობდნენ. უწყებამ დაადგინა, რომ ანგარიშები მოსკოვში მცხოვრები ბიზნესმენ ილან შორის მხარდაჭერებს უკავშირდებოდა, რომლებიც აკრძალული პარტიის წევრები არიან.
პოლიციის თქმით, ბრალდებულებმა რუსულ ბანკში ანგარიშების საშუალებით ათი ათასობით ამომრჩეველი მოისყიდეს.
შორს სასამართლოზე დაუსწრებლად 2014 წელს მოლდოვის ბანკებიდან 1 მილიარდი დოლარის გაუჩინარებასთან დაკავშირებით 15 წლის ვადით პატიმრობა მიესაჯა.
ქვეყნის პრეზიდენტი, მაია სანდუ მოსკოვს ხელისუფლების დამხობის მცდელობაში ადანაშაულებს, რუსეთი კი მას "რუსოფობიის" წახალისებაში სდებს ბრალს.
