საზღვარგარეთ მცხოვრები ქართველი დევნილები 26 ოქტომბრის არჩევნებში მონაწილეობას შეძლებენ. მათ რეგისტრაცია 7 ოქტომბრამდე უნდა გაიარონ, რის შემდეგაც, ერთიან საარჩევნო სიაში მოხვდებიან. ცესკო-ს გადაწყვეტილებაზე ინფორმაციას სახალხო დამცველი ავრცელებს.
"გუშინ ოფიციალური მოწოდებით მივმართეთ ცენტრალურ საარჩევნო კომისიას და მოვითხოვეთ, რომ ჩვენი მოქალაქეები, საზღვარგარეთ მცხოვრები დევნილები არ დარჩენილიყვნენ ხმის უფლების გარეშე.
დღეს ცენტრალურმა საარჩევნო კომისიამ, ოპოზიციურ პარტიების ჩართულობით მნიშვნელოვანი გადაწყვეტილება მიიღო, რითაც საზღვარგარეთ მცხოვრებ ქართველ დევნილებს 7 ოქტომბრამდე რეგისტრაციის შემთხვევაში, შესაძლებლობა ექნებათ მოხვდნენ ერთიან საარჩევნო სიაში და 26 ოქტომბერს მონაწილეობა მიიღონ არჩევნებში.
ჩემთვის, როგორც სახალხო დამცველისთვის, პრინციპულად მნიშვნელოვანია, არ დარჩეს არცერთი საქართველოს მოქალაქე არჩევნებში მონაწილეობის უფლების გარეშე, იქნება ეს ქვეყნის შიგნით თუ ქვეყნის გარეთ. განსაკუთრებით მისასალმებელია, რომ ახალმა დადგენილებამ ეს შესაძლებლობა ჩვენს დევნილ მოქალაქეებსაც მისცა“ - ამბობს ლევან იოსელიანი.
