2024 წლის საქართველოს მასწავლებლის ეროვნული ჯილდოს გამარჯვებული თბილისის N26 საჯარო სკოლის დაწყებითი საფეხურის მასწავლებელი, ნათია უჩავა გახდა.
გამარჯვებულს გენერალური სპონსორისგან – გუდავაძე-პატარკაციშვილის ფონდისგან 15 000 ლარი გადაეცა.
კონკურსი ლიბერთი ბანკის სტრატეგიული პარტნიორობით მერვედ ჩატარდა და საუკეთესო ათეულის წევრები ლიბერთი ბანკმა ტრადიციულად წელსაც დააჯილდოვა.
წელს მასწავლებლის ეროვნული ჯილდოს ფინალისტებს შორის იყვნენ:
გიორგი ლიპარიშვილი – თბილისის მე-6 საავტორო სკოლის, ათასწლეულის სკოლის, საერთაშორისო ქართული სკოლის, სახვითი და გამოყენებითი ხელოვნების და ქართული ენისა და ლიტერატურის მასწავლებელი;
ნათია ნარსავიძე – დმანისის ℕ𝟛 საჯარო სკოლის ინგლისური ენის მასწავლებელი;
დიმიტრი პოპოვი – გურჯაანის მუნიციპალიტეტის სოფელ გურჯაანის საჯარო სკოლის მათემატიკის და კომპიუტერული ტექნოლოგიების მასწავლებელი;
სოფიო ქუხილავა – მესტიის მუნიციპალიტეტის სოფელ წვირმის საჯარო სკოლის ინგლისური ენის მასწავლებელი.
მასწავლებლის ეროვნული ჯილდო 2017 წლის 13 მაისს დაწესდა. ეს ინიციატივა საქართველოში უკვე მერვედ ჩატარდა და მასწავლებელთა პოპულარიზაციისკენ მიმართული გლობალური კამპანიის – The Global Teacher Prize ნაწილია.
