7 აგვისტოს ღამეს რუსეთმა უკრაინაზე შაჰედის ტიპის 30 უპილოტო საფრენი აპარატით იერიში მიიტანა, უკრაინამ 30-ვე ირანული შაჰედის ჩამოგდება მოახერხა.
ამასთან დაკავშირებით ინფორმაციას თავის ტელეგრამ გვერდზე უკრაინის საჰაერო ძალების მეთაური, გენერალ-ლეიტენანტ ნიკოლაი ოლეშჩუკი ავრცელებს.
"საზენიტო ბრძოლის შედეგად, მტრის ყველა უპილოტო საფრენი აპარატი კიევის, ხმელნიცკის, ვინიცას, ნიკოლაევის, ხერსონის, ხარკოვისა და ჩერკასის რეგიონებში ჩამოაგდეს". - წერს ოლეშჩუკი.
ოლეშჩუკის ცნობით,გასულ ღამეს ოკუპანტებმა უკრაინაზე იერიში რუსეთში მდებარე პრომორსკო-ახტარსკისა და იერსკის ტერიტორიიდან მიიტანეს.
მტრის დრონების ჩამოგდებაში მონაწილეობდნენ უკრაინის თავდაცვის ძალების მობილური საცეცხლო ჯგუფები, საზენიტო-სარაკეტო დანაყოფები და საჰაერო ძალების რადიოელექტრონული დანაყოფები.
