ჯანდაცვის მსოფლიო ორგანიზაციამ (WHO) ე.წ. მაიმუნის ყვავილთან დაკავშირებით ჯანდაცვის სფეროში გლობალური საგანგებო მდგომარეობა გამოაცხადა.
ორგანიზაციის გადაწყვეტილება მსოფლიოში ზემოხსენებული ვირუსით ინფიცირებების შემთხვევების ზრდას უკავშირდება. WHO-მ საგანგებო მდგომარეობის გამოცხადების გადაწყვეტილება ვირუსის შესახებ მოწვეული სპეციალური კომიტეტის მეორე შეხვედრის დასრულების შემდეგ მიიღო.
ორგანიზაციის გენერალური დირექტორის, ტედროს გებრეისუსის თქმით, 75 ქვეყანაში ვირუსის 16 000-ზე მეტი შემთხვევაა რეგისტრირებული. ვირუსის შედეგად კი 5 ადამიანია გარდაცვლილი.
"ჯანდაცვის მსოფლიო ორგანიზაციის შეფასებით, ე.წ. მაიმუნის ყვავილის გავრცელების რისკი გლობალურად და ყველა რეგიონში საშუალოა, გარდა ევროპისა, სადაც ჩვენ რისკს ვაფასებთ, როგორც მაღალს". - თქვა გებრეისუსმა.
აღსანიშნავია, რომ დღესდღეობით ჯანდაცვის სფეროში მხოლოდ ორი მსგავსი საგანგებო მდგომარობა მოქმედებს, კორონავირუსის პანდემია და მუდმივი ძალისხმევა პოლიომიელიტის წინააღმდეგ.
