შინაგან საქმეთა სამინისტროს ინფორმაციით, დააკავეს 1992 წელს დაბადებული გ.ბ. ოჯახის ორი ან მეტი წევრის მიმართ დამამძიმებელ გარემოებაში ჩადენილი განზრახ მკვლელობის ბრალდებით. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.
უწყების ცნობით, გუშინ 27 აპრილს, ვაზისუბნის მე-4 მიკრორაიონში, ერთ-ერთ ბინაში ხანძარზე გამოძახებულ სამაშველო რაზმს ბინის კარი შიგნიდან ურდულით ჩაკეტილი დახვდა. ბინაში შეღწევის და ხანძრის ლიკვიდაციის შემდეგ, მაშველებმა 1964 წელს დაბადებული ზ.ბ.-ს და მისი მეუღლის - 1967 წელს დაბადებული ლ.თ.-ს დამწვარი ცხედრები იპოვეს, რომლებსაც თავის არეში ცეცხლნასროლი იარაღიდან მიყენებული ჭრილობები ჰქონდათ.
გამოძიებით დგინდება, რომ ბრალდებულმა ბინაში მძინარე მშობლებს (ზ.ბ.-ს და ლ.თ.-ს) ცეცხლსასროლი იარაღიდან გასროლით თავის არეში დაზიანებები მიაყენა, რის შედეგადაც ორივე მათგანი ადგილზე გარდაიცვალა.
ბრალდებულმა ჩადენილი დანაშაულის დაფარვის მიზნით, ყაჩაღობის ინსცენირება მოაწყო, კერძოდ: კარადებიდან გადმოყარა ტანსაცმელი და სხვადასხვა ნივთი, მოძებნა მშობლების კუთვნილი თანხა და ოქროს სამკაულები, შემდეგ ბინაში განზრახ გააჩინა ხანძარი და შემთხვევის ადგილიდან მიიმალა.
შსს-ს ცნობით, დანაშაულის ჩადენის იარაღები, ბინიდან წაღებული თანხა და ოქროს სამკაულები ამოღებულია ნივთმტკიცებად.
ოჯახის ორი ან მეტი წევრის მიმართ დამამძიმებელ გარემოებაში ჩადენილ განზრახ მკვლელობის ფაქტზე გამოძიება საქართველოს სსკ-ის 11 პრიმა-109-ე მუხლის მე-2 ნაწილის "ვ" ქვეპუნქტით და 109-ე მუხლის მე-3 ნაწილის "ა" ქვეპუნქტით მიმდინარეობს.
