საერთაშორისო რესპუბლიკური ინსტიტუტის (IRI) ბოლო კვლევის თანახმად, მოსახლეობის უმრავლესობა ფიქრობს, რომ ბოლო ერთი წლის განმავლობაში საქართველოს ეკონომიკური მდგომარეობა მკვეთრად ან ნაწილობრივ გაუარესდა. შესაბამის კითხვაზე 1%-ზე ნაკლები ამბობს, რომ მდგომარეობა მკვეთრად გაუმჯობესდა, 5%-სთვის ნაწილობრივ გაუმჯობესდა, 18% ამბობს, რომ იგივე დარჩა, 31%-სთვის ნაწილობრივ გაუარესდა, ხოლო 45%-სთვის მკვეთრად გაუარესდა.
აღსანიშნავია, რომ ბოლო 10 წლის მანძილზე, ყველაზე მეტი გამოკითხული მიუთითებს ეკონომიკური მდგომარეობის მკვეთრად გაუარესებაზე. აქამდე, ყველაზე მაღალი ეს მაჩვენებელი 2021 წელს იყო (39%), ხოლო ყველაზე დაბალი - 2013 წელს (1%).
საველე სამუშაოები IRI-ის დაკვეთით 4-24 მარტს, გამოკითხვისა და მარკეტინგის ინსტიტუტმა ჩაატარა. პირისპირ ინტერვიუების მეთოდით გამოიკითხა 1 486 ხმის უფლებისა და ასაკის მქონე მოქალაქე. მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად. ცდომილების ზღვარი +/- 2.5%-ია, გამოპასუხების მაჩვენებელი – 64%.