რეზო ამაშუკელი

"სამშობლოს მოჭირნახულე, ბობოქარი სულის დიდი პოეტი იყო" – ილია II რეზო ამაშუკელზე

საქართველოს საპატრიარქო პოეტის, რეზო ამაშუკელის გარდაცვალების გამო კათოლიკოს-პატრიარქის, ილია II-ის სამძიმარს აქვეყნებს

"საქართველოს გულშემატკივარი, სამშობლოს მოჭირნახულე, დაუღალავი ბატონი რეზო (რევაზ) ამაშუკელი დღეს სამზეოს ტოვებს. 

მისი ბასრი სიტყვა და მკვეთრი პოზიცია იმ რეალობასთან შეჯახების შედეგი იყო, რომელიც გულწრფელად არ მოსწონდა. 

მართალია, მისი პოზიციისადმი საზოგადოების გარკვეულ ნაწილს განსხვავებული აზრი ჰქონდა, მაგრამ, ალბათ, ყველა, ვისაც კი სამართლიანობის გრძნობა და ლიტერატურის სიყვარული აქვს, აღიარებს, რომ იგი იყო ბობოქარი სულის დიდი პოეტი, რომელიც გამორჩეული გარეგნობით, ძლიერი ხმითა და თავისი შესანიშნავი ლექსების დეკლარირებით წარუშლელად დარჩება ჩვენს მეხსიერებაში.

აღვავლენთ ლოცვებს ბატონი რეზოს (რევაზის) უკვდავი სულისათვის, რათა უფალმა სავანესა მართალთასა დააწესოს იგი, ხოლო ახლობლებსა და გულშემატკივართ მომადლოს მშვიდობა და მისთვის ლოცვის ძალა". - წერია საპატრიარქოს განცხადებაში. 

რეზო ამაშუკელი 10 იანვარს 85 წლის ასაკში გარდაიცვალა. ჯერჯერობით უცნობია, სად დაკრძალავენ მას. კულტურის სამინისტროში ტაბულას უთხრეს, რომ ვერ დაგვიდასტურებენ, იგეგმება, თუ არა რეზო ამაშუკელის დიდუბის, ან მთაწმინდის პანთეონში დაკრძალვა და რომ მის ოჯახთან "სხვა ვარიანტებზე მიდის მსჯელობა".  

კომენტარები