კომპანია Merck & Co-მ Covid-19-ის სამკურნალო ანტივირუსული მედიკამენტის გადაუდებელი გამოყენებისთვის ავტორიზაციის მინიჭებისთვის აშშ-ს საკვებისა და მედიკამენტების სააგენტოს (FDA) მიმართა. ავტორიზაციის მიღების შემთხვევაში, Merck-ის მედიკამენტი Covid-19-ის სამკურნალო პირველი დასალევი ტაბლეტი გახდება, რაც, სავარაუდოდ, მნიშვნელოვნად გაამარტივებს Covid-19-ის კლინიკურ მართვას, რადგან პაციენტები წამლის სახლის პირობებში მიღებას შეძლებენ.
"პანდემიის განსაკუთრებული გავლენა მოითხოვს, რომ უკიდურესი სისწრაფით ვიმუშავოთ და სწორეს ეს გააკეთა ჩვენმა გუნდმა, როცა FDA-ს მოლნუპირავირის ავტორიზაციაზე განცხადებით მიმართა შედეგების მიღებიდან 10 დღეში" - თქვა Merck-ის პრეზიდენტმა რობერტ დავისმა.
პირველ ოქტომბერს Merck-მა მედიკამენტის კვლევის მესამე ფაზის შუალედური შედეგები გამოაქვეყნა. კომპანიების თქმით, პრეპარატმა წარმატებით შეძლო Covid-19-ის რისკჯგუფების პაციენტებისთვის, კვლევის დროს, ვირუსის გართულება თავიდან აერიდებინა. კოვიდსაწინააღმდეგო ტაბლეტებმა საკვლევ ჯგუფში, ჰოსპიტალიზაციისა და სიკვდილიანობის რისკები მარტივი ან საშუალო მდგომარების ინფიცირებულ პაციენტებში 50%-ით შეამცირა.
მოლნუპირავირი არის მედიკამენტი, რომელიც ვირუსის რნმ-ს დააზიანებს და მის რეპლიკაციას ხელს შეუშლის.
კორონავირუსთან საბრძოლველად ამჟამად გამოყენებული მედიკამენტები, რომელთაგან ზოგი დიდ ბრიტანეთში სამკურნალოდაც დაამტკიცეს, განსხვავებულად მოქმედებენ. ისინი მონოკლონური ანტისხეულებით მზადდება. მონოკლონური ანტისხეულები არის ლაბორატორიაში დამზადებული პროტეინები, რომლებიც იმუნურ სისტემას ბაძავენ და ორგანიზმში არსებულ ანტიგენებს ებრძვიან. ამისგან განსხვავებით, ზემოხსენებული კომპანიების მედიკამენტების მიზანი უშუალოდ ვირუსთან გამკლავება და მისი ორგანიზმში გამრავლების შეჩერებაა.
