აჭარაბეთის კორპორაციული სოციალური პასუხისმგებლობის პლატფორმა ინიციატივის და პროექტის “აქტიური ცხოვრება ჩემი სტიქიაა” ფარგლებში გაიმართა აფხაზეთის ომის გმირის თემო სახოკიას სახელობის ინტეგრირებული ბოულინგის ჩემპიონატი საქართველოს პირველობაზე 2021.
ჩემპიონატში მონაწილეობა მიიღეს სამშვიდობო მისიებსა და სხვადასხვა საომარ მოქმედებაში დაჭრილ-დაშავებულმა სამხედრო მოსამსახურეებმა, ომის ვეტერანებმა, პარასპორტსმენებმა, შშმ პირებმა, აფხაზეთიდან დევნილებმა და საზოგადოებისთვის ცნობილმა სახეებმა.
ჩემპიონატში ასევე მონაწილეობდნენ ტიტულოვანი პარასპორტსმენები თემურ დადიანი და ნინო საბაშვილი. თემური ევროპის ჩემპიონი და მსოფლიოს ვიცეჩემპიონია მკლავჭიდში. ასევე, პარამოთხილამურე და გინესის 2-გზის რეკორდსმენი. ნინო წოლჭიმში ორგზის მსოფლიო ვიცეჩემპიონი და მკლავჭიდში სამგზის მსოფლიო პრიზიორი და ვიცეჩემპიონი გახლავთ.
"პროექტის "აქტიური ცხოვრება ჩემი სტიქიაა"- ს ფარგლებში წელს პირველად გაიმართა აფხაზეთის ომის გმირის თემო სახოკიას სახელობის ჩემპიონატი და დამკვიდრდა მისი სახელობის გარდამავალი თასი, რომელიც ამიერიდან 1 წლით გამარჯვებულ გუნდს გადაეცემა. სიმბოლურია, მაგრამ ნიშანდობლივი, რომ სწორედ თემოს ვაჟმა ლუკა სახოკიამ აჩვენა საუკეთესო შედეგი ინდივიდუალურ მაჩვენებელში. ჩვენი ორგანიზაციისა და მხარდამჭერებისთვის მნიშვნელოვანია მივცეთ მონაწილეებს მეტი სტიმული იყვნენ აქტიურები და სხვებსაც მისცენ ამის მაგალითი.
ჩვენი მიზანია საზოგადოებაში შეზღუდული შესაძლებლობის მქონე პირთა სრულფასოვანი ინტეგრაციის ხელშეწყობა სპორტულ-შემოქმედებითი და სოციალურ პროექტებში ჩართულობის გზით.“ -განაცხადა ახალგაზრდული მედიაკავშირისა და პროექტის დირექტორმა ხათუნა გავაშელმა.
ჩემპიონატის აუცილებელი პირობა იყო, რომ თამაშის დროს ყველა მონაწილეს ეტლით უნდა ესარგებლა. ტურნირი გუნდური პრინციპით ჩატარდა. გამოვლინდა როგორც ჩემპიონი გუნდი, ასევე საუკეთესო ინდივიდუალური მონაწილე. გამარჯვებულებს 1 წლით გარდამავალი თასი, ფულადი პრიზები, დიპლომები, მედლები და ღონისძიების მხარდამჭერების მიერ დაწესებული სხვადასხვა პრიზი გადაეცათ.
