2021 წლის თებერვლის ბოლოს, იმერული ხაჭაპურის გამოცხობის ხარჯებმა, საშუალოდ, 4.69 ლარი შეადგინა.
ISET–PI-ის მიერ გაანგარიშებული ხაჭაპურის ინდექსი ეროვნული კერძის, იმერული ხაჭაპურის მომზადების ღირებულებას წარმოადგენს და ყოველთვიურად ქვეყნდება.
ინსტიტუტის მიხედვით, ხაჭაპურის მომზადება წინა თვესთან(იანვარი) შედარებით 3.1%-ით იაფი დაგიჯდებათ, მაგრამ წინა წლის ანალოგიურ პერიოდთან შედარებით ინგრედიენტების ფასი 7.8%-ითაა გაზრდილი.
ხაჭაპურის გამოცხობის ხარჯის 7.8%-იანი ზრდა შემდეგი პროდუქტების გაძვირებამ გამოიწვია:
- ფქვილი – 18.8%
- საფუარი – 16.3%
- კარაქი – 14.6%
- ყველი – 9.5%
- კვერცხი – 7%
- რძე – 6.9%
ინსტიტუტის მიხედვით, წლის ამ დროს, ახალი რძის მიწოდება სეზონურობიდან გამომდინარე მცირდება, რასაც პროდუქტის იმპორტირებული ფხვნილით ჩანაცვლება მოსდევს. იმპორტული პროდუქტის გაძვირება კი პირდაპირპროპორციულადაა დაკავშირებული ქართული ვალუტის გაუფასურებასთან.