ჩანაწერები

პაპუაშვილი ჩანაწერზე: ჰაერში შეთანხმების სუნია და ოპოზიცია მაგიდის ატრიალებას იწყებს

"ბოლო დღეები ვხედავთ, რომ ჰაერში შეთანხმების სუნი ტრიალებს… ჰოდა, ჰოი საოცრებავ, რას აკეთებს ოპოზიცია, ალბათ რიგმა მოუწია და, ამჯერად ლელოს და ტვ პირველის ხელით". – ასე ეხმაურება ქართული ოცნების დეპუტატი შალვა პაპუაშვილი TV პირველის ეთერში გავრცელებულ ჩანაწერებს, რომელშიც, ავტორების მტკიცებით, პრემიერმინისტრი ირაკლი ღარიბაშვილი და ბიძინა ივანიშვილის შვილი, ბერა ივანიშვილი საუბრობენ. 

ამის შესახებ პაპუაშვილი Facebook-ზე წერს: 

"მიხვდით, ჰო, რაც ხდება? ევროპის საბჭოს პრეზიდენტი მედიატორობს და შეთანხმების გზებს ეძებს.

შარლ მიშელთან შეხვედრის შემდეგ, დილის პიკეტის მოწყობისთვის, ოპოზიციას ბოდიშები და დაანონსებული აქციების გადადება უწევს. ევროპა მკაცრად აკვირდება, რამდენად კონსტრუქციულია ოპოზიცია დიალოგში და რეაქციებიც არ აყოვნებს.

ბოლო დღეები ვხედავთ, რომ ჰაერში შეთანხმების სუნი ტრიალებს… ჰოდა, ჰოი საოცრებავ, რას აკეთებს ოპოზიცია, ალბათ რიგმა მოუწია და, ამჯერად ლელოს და ტვ პირველის ხელით…

…უკვე მერამდენედ. როცა შეთანხმება ახლოსაა, იწყებენ მაგიდის ატრიალებას. პირველ ჯერზე საკუთარი პარტიის თავმჯდომარეც კი გააქციეს პარტიიდან, ეს ვისთან მქონია საქმეო.

ამ ჯერზე, არ მგონია, გამოუვიდეთ. ევროპის გზავნილი აშკარაა: ან იქცევიან კონსტრუქციულად და პასუხისმგებლიანად, ან რჩებიან სამი ტელევიზიის სტუდიებს შორის მომთაბარე მარგინალებად.

არადა, როგორ ხელის გულზე დევს ყველაფერი… რა პასუხისმგებლობაზე და სამშობლოს სიყვარულზეა საუბარი, ერთადერთ მიზნად მოლაპარაკების ჩაშლა რომ გაქვს. ასე იცის, ხალხის ნაცვლად ბაბლზე რომ მუშაობ.

გამოდით ბაბლიდან, გამოდით… გარეთ მზეა. ცაც, ტელესტუდიებისგან განსხვავებით, უღრუბლო. ხალხს დაენახეთ და ხალხი დაინახეთ. ხუთი წუთი მაინც დაფიქრდით რამეზე ძალაუფლების ხელში ჩაგდების გზების ძიების გარდა". – წერს ქართული ოცნების დეპუტატი. 


შეაგინე ბერას – ამ სახელწოდებით 7 მარტს, 18:30 საათზე მთავრობის ადმინისტრაციასთან საპროტესტო აქცია გაიმართება. 

ლელომ ტელეკომპანია პირველის ეთერში გასულ ჩანაწერთან დაკავშირებით განცხადება გაავრცელა, სადაც აღნიშნულია, რომ პარტიისთვის ირაკლი ღარიბაშვილთან და მისი ჩართულობით ნებისმიერ ფორმატში მონაწილეობის მიღება მიუღებელია. 

კომენტარები