ჩინური კომპანია ByteDance-ი თანახმაა 92 მილიონი დოლარი გადაიხადოს სასამართლო სარჩელის დასაკმაყოფილებლად, რომელშიც გასართობ აპლიკაცია TikTok-ს კონფიდენციალურობის პოლიტიკის დარღვევასა და მომხმარებლების პირადი ინფორმაციის უკანონოდ მითვისებაში ადანაშაულებენ.
TikTok-ის წინააღმდეგ სასამართლო დავების სერია, წელიწადზე მეტია, მიმდინარეობს და ის მოიცავს ათეულობით სარჩელს, რომლებშიც მომხმარებლები TikTok-ს არაერთ სამართლებრივ დარღვევაში ადანაშაულებენ, მათ შორის, პერსონალური ინფორმაციის ჩინეთის კომუნისტური მთავრობისათვის გადაცემაში.
შეთანხმების ამჟამინდელი პირობების თანახმად, აპლიკაცია მომხმარებლების ნებართვის გარეშე ვეღარ მიიღებს პერსონალურ ინფორმაციას, გარდა ამისა, TikTok-ს აეკრძალება GPS-ის საშუალებით ლოკაციის დადგენა და თვალთვალი.
ექსპერტების თქმით, ეს შემთხვევა 2020 წელს მომხდარ Facebook-ის სკანდალს ჰგავს, რომლის მოსაგვარებლადაც კომპანიას 650 მილიონი დოლარის გადახდა მოუწია. იმ შემთხვევაშიც, საკითხი კონფიდენციალურობის პოლიტიკასა და პირადი ინფორმაციის უნებართვოდ მითვისებას ეხებოდა.