ჯანდაცვის მსოფლიო ორგანიზაციის (WHO) ცნობით, პარასკევს, 17 ივლისს, ახალი კორონავირუსის გლობალური შემთხვევების რეკორდული მაჩვენებელი აღირიცხა. ორგანიზაციის ცნობით, ბოლო 24 საათში, მსოფლიო მასშტაბით, ახალი კორონავირუსით ინფიცირებული ადამიანების რაოდენობა 237 743-ით გაიზარდა.
ამათგან შემთხვევების ყველაზე მეტი რაოდენობა აშშ-ში, ბრაზილიაში, ინდოეთსა და სამხრეთ აფრიკაში აღირიცხა. WHO-ს მიერ აღრიცხული წინა რეკორდული მაჩვენებლი 12 ივლისს 230 370 შემთხვევა იყო.
ამის ფონზე არ შეცვლილა ვირუსით გამოწვეული სიკვდილიანობის საშუალო მაჩვენებელი, რომელიც ივლისში საშუალოდ დღეში 5 000 იყო.
ახალი კორონავირუსის შემთხვევებმა 17 ივლისს 14 მილიონს გადააჭარბა. დაავადების შედეგად ჯამში 590 000 ადამიანზე მეტი გარდაიცვალა.
რაც შეეხება საქართველოს, ახალი კორონავირუსი ჯამში 1 018 ადამიანს დაუდასტურდა, მათგან გამოჯანმრთელდა 895, 15 ინფიცირებული კი გარდაიცვალა. ბოლო 24 საათში ინფიცირებულების რაოდენობა 8-ით გაიზარდა, გამოჯანმრთელებულებისა კი - 10-ით.
ამ დროისთვის საქართველოში კორონავირუსის 108 აქტიური შემთხვევაა.
