იტალიაში ბოლო 24 საათში კორონავირუსით კიდევ 475 ადამიანი დაიღუპა, დადასტურდა ინფიცირების 4207 ახალი შემთხვევა. იტალიაში ჯამურად დაღუპულთა რიცხვი 2978-ია, ხოლო ინფიცირებულთა - 35,713.
იტალია დაღუპულთა და ინფიცირებულთა ჯამური რიცხვით მხოლოდ ჩინეთს ჩამორჩება. ქვეყანაში სიკვდილიანობა 8%-ია, რაც გაცილებით მაღალი მონაცემია, ვიდრე სხვაგან. იტალიის ჯანმრთელობის ეროვნული ინსტიტუტის ანგარიშის მიხედვით, იტალიაში კორონავირუსით დაღუპულთა 99%-ზე მეტს სხვა დაავადება სჭირდა. ახალი ვირუსით გარდაცვლილთა საშუალო ასაკი 79.5 წელია, ინფიცირებულთა - 63 წელი.
იტალიის ჯანმრთელობის ეროვნული ინსტიტუტის ინფორმაციით, იტალიაში კორონავირუსით დაღუპულთა მხოლოდ 0.8%-ს არ ჰქონდა რამე დაავადება. 48.5%-ს სამი ან მეტი დაავადება სჭირდა, 25.6%-ს - ორი, ხოლო 25.1%-ს - ერთი მაინც.
დაღუპულთა 75%-ზე მეტს მაღალი წნევა ჰქონდა, დაახლოებით 35%-ს - დიაბეტი, 1/3-ს კი, გულის დაავადება აწუხებდა.
აღსანიშნავია, რომ კვლევის შედეგად, იტალიაში კორონავირუსით დაღუპულთა 18%-ის მონაცემები შეისწავლეს.
როგორც ანგარიშში წერია, 17 მარტის მონაცემებით, კორონავირუსით 50 წლამდე ასაკის 17 ადამიანი დაიღუპა. ახალი ვირუსით დაღუპული 40 წლამდე პირი ყველა მამაკაცი იყო - სერიოზული დაავადებებით.
იტალია 10 მარტიდან მთლიანად კარანტინის ზონად არის გამოცხადებული.
