ლაფერაშვილის დაკითხვა

ლაფერაშვილი: პროკურატურაში დაბარებას ტელეკომპანია "ფორმულას" ეთერში გასვლას ვუკავშირებ

„ვისაც პრემია ოდესმე აგიღიათ გეპატიჟებით პროკურატურაში ჩემთან ერთად, მეტი პასუხი მე არ მაქვს,“ - ტელეკომპანია „ფორმულას“ საინფორმაციო სამსახურის უფროსი გიორგი ლაფერაშვილი მთავარ პროკურატურაში მივიდა. ლაფერაშვილი საგამოძიებო უწყებაში მის დაბარებას  „ფორმულას“ ეთერში გასვლას უკავშირებს.

„გული მწყდება იმაზე, რომ საეთეროში უნდა ვიჯდე ახლა და ეთერში უნდა გამყავდეს შიდა ეთერი, ორი დღეც არ დარჩა ეთერში გასვლამდე და ამ მნიშვნელოვან დროს ვკარგავ არაფერში. არ ვიცი ქალბატონ ნინო ნიჟარაძეს რომელი თანხები აინტერესებს, მისი ყოფილი მეუღლის მიერ ჩემთვის მოცემული პრემიები აინტერესებს თუ ნიკა გვარამიას მიერ ჩემთვის მოცემული პრემიები. არ ვიცი რაშია საქმე, ამას გავარკვევ. ეს ყველაფერი, რაზეც ორი თვეა საზოგადოებას ამდენი ესმის, აქტუალური გახდა მას შემდეგ რაც ეთერში გავიდა ტელეკომპანია „ფორმულა“,“ - ამბობს ლაფერაშვილი.

პროკურატურა სამაუწყებლო კომპანია რუსთავი 2-ის "კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების ან გადამალვის" საქმეს იძიებს. 

ამ საქმეზე ტელეკომპანია "ფორმულას დირექტორი", ზურაბ გუმბარიძე მთავარ პროკურატურაში გუშინ გამოკითხეს.

შეგახსენებთ, პროკურატურამ აღნიშნულ საქმეზე გამოძიება 2019 წლის 20 ივლისს დაიწყო. უწყების ცნობით, საქმეზე გამოძიების დაწყებას საფუძვლად დაედო, რუსთავი2-ის 9%-იანი წილის ყოფილი მფლობელის ნინო ნიჟარაძის ადვოკატის განცხადება ტელეკომპანიის ხელმძღვანელების მხრიდან შესაძლო დანაშაულის ჩადენის თაობაზე. 

9 აგვისტოს ნიკა გვარამიას ბრალი წარედგინა. პროკურატურის განცხადებით, გვარამიას ბრალად ედება "სამაუწყებლო კომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენება, დიდი ოდენობით თანხების სამსახურეობრივი მდგომარეობის გამოყენებით მითვისება და ქონების მოჩვენებითი ან/და თვალთმაქცური გარიგების გზით გადამალვა".

კონკრეტულად, საგამოძიებო უწყების ცნობით, გვარამიამ რუსთავი 2-ის სახელით ხელშეკრულება გააფორმა მისი მეგობრების კომპანიასთან "ინტერ მედია პლუსი" და მათ არხის ეთერში რეკლამის განთავსების უფლება მისცა. შეთანხმების მიხედვით, მოხმარებული სარეკლამო დროის მიუხედავად, "ინტერ მედია პლუსს" წინასწარ შეთანხმებული ოდენობის თანხა უნდა გადაეხადა. პროკურატურის მტკიცებით, მისი მეგობრებისთვის გამორჩენის მისაღებად, გვარამიამ კომპანიისგან განზრახ არ მოითხოვა ჯამში 6 763 510 ლარი, რითაც მის მეგობრებს მისცა შესაძლებლობა, რეკლამის განთავსების სანაცვლოდ მიღებული თანხები საკუთარ ანგარიშზე შეეტანათ და არ გადაეხადათ რუსთავი 2-სთვის.

11 აგვისტოს საქალაქო სასამართლომ გვარამიამ აღკვეთის ღონისძიების სახით 40 000-ლარიანი გირაო შეუფარდა. პროკურატურა 80 000 ლარს ითხოვდა. ნიკა გვარამია აცხადებდა, რომ ის გირაოს გადახდას არ აპირებდა. თუმცა 11 სექტემბერს facebook-ზე დაწერა, რომ გირაოს გადაიხდიდა.

კომენტარები