კანადის საპარლამენტო არჩევნებში ლიბერალურმა პარტიამ გაიმარჯვა

კანადაში ოპოზიციურმა ლიბერალურმა პარტიამ საყოველთაო არჩევნებში გაიმარჯვა. პარტიამ ოტავის ფედერალურ პარლამენტში მანდატების უმრავლესობა მოიპოვა.

ლიბერალური პარტიის ლიდერი, ჯასტინ ტრიუდო შეცვლის პრემიერმინისტრ სტივენ ჰარპერს, რომელიც ამ პოსტზე 9 წლის განმავლობაში იმყოფებოდა.

„კანადელმა ხალხმა მკაფიოდ განაცხადა, რომ დროა ცვლილებებისთვის“, - თქვა ტრიუდომ ოტავაში მხარდამჭერების წინაშე სიტყვით გამოსვლისას.

სტივენ ჰარპერის თქმით, მან უკვე მიულოცა ტრიუდოს გამარჯვება.

„კანადელმა ხალხმა ლიბერალური მთავრობა აირჩია, რასაც ჩვენ ყოველგვარი ყოყმანის გარეშე მივიღებთ“, - თქვა ჰარპერმა.

სავარაუდოდ, სტივენ ჰარპერი კონსერვატორიული პარტიის ლიდერის პოსტს დატოვებს, თუმცა დარჩება პარლამენტში, როგორც კანონმდებელი.