სამართალდამცველებმა თელავის გამგეობის ზედამხედველობის სამსახურის მთავარი სპეციალისტი, 1977 წელს დაბადებული ზურაბ ბურდული და სსიპ თელავის მერიის სასპორტო გაერთიანების მასწავლებელი, 1976 წელს დაბადებული შალვა ბეგიაშვილი დიდი ოდენობით ნარკოტიკული საშუალების უკანონო შეძენა-შენახვის და დამზადების ბრალდებით დააკავეს. ორივე მათგანი თელავის რაიონის სოფელ ვარდისუბანში, შალვა ბეგიაშვილის საცხოვრებელი სახლიდან აიყვანეს. შსს-ს ცნობით, ბრალდებულები პირადი მოხმარების მიზნით ნარკოტიკულ საშუალებას ამზადებდნენ. გამოძიება ჯგუფის მიერ დიდი ოდენობით ნარკოტიკული საშუალების უკანონო შეძენა-შენახვისა და დამზადების ფაქტზე მიმდინარეობს (საქართველოს სსკ-ის 260-ე მუხლის მე-2 ნაწილის „ა“ და „ბ“ ქვეპუნქტით), რაც სასჯელის სახით 7–დან 14 წლამდე თავისუფლების აღკვეთას ითვალისწინებს.
"ექსპერტიზის დასკვნით, სახლიდან ამოღებულია 5,681 გრ ოპიუმის შემცველი ყაყაჩოს ექსტრაქტი. ორივე დაკავებული აღიარებს ჩადენილ დანაშაულს“, – აცხადებენ შსს–ში.
კახეთის საინფორმაციო ცენტრის ინფორმაციით, თელავის რაიონული სასამართლოს მოსამართლე ნათელა ჯაშიაშვილი ამ წუთებში განიხილავს დაკავებულებისთვის აღკვეთის ღონისძიების სახით, პატიმრობის შეფარდების შესახებ პროკურატურის შუამდგომლობას.
