კანცელარიასთან ქალთა მიმართ ძალადობას აქცია-პერფორმანსით აპროტესტებენ

სახელმწიფო კანცელარიასთან ქალთა გახშირებულ მკვლელობებს აქცია-პერფორმანსით აპროტესტებენ. აქციის - "ქალების ხმა" - მონაწილეებმა კანცელარიასთან მიიტანეს ქვაბები, ჯამები და სხვა სახის ჭურჭელი. ასევე, თავსაფრით აიხვიეს თვალები და აიკრეს პირი.

"ბევრჯერ გვითხრეს, რომ არ უნდა შევიმჩნიოთ, არც ვილაპარაკოთ, იმიტომ რომ ქალები ვართ. მორჩილება და დუმილი გვმართებს. პერფორმანსი იქნება ილუსტრაცია არსებული რეალობის. შეიძლება ვინმეს არ მოსწონდეს ის, რომ ეს ფორმა ქალს, როგორც მსხვერპლს წარმოაჩენს, მაგრამ ფაქტია და სჯობს, სიმართლე აღვწეროთ - ჩვენ ვართ მსხვერპლი. კულტურის, ფსევდოტრადიციების, ეკლესიის, აგრესიული პატრიარქატის. ამის შემდეგ კი ავხმაურდებით იმ ინსტრუმენტებით, რაც ხელთ დაგვიტოვეს - ქვაბებით. კანცელარიასთან თვალახვეულები და პირაკრულები მთავრობას შევახსენებთ, რომ ჩვენი ეს მდგომარეობა მათი პასუხისმგებლობაა. მათი დანაშაულია. თუ თვალს აგვარიდებენ, ქვაბების ხმა მაინც შეაწუხებთ", - აცხადებს აქციის ორგანიზატორი სოფო კილასონია.