ოკუპირებულ აფხაზეთში 24 აგვისტოს ე.წ. საპრეზიდენტო არჩევნები ჩატარდება. მარიონეტული რეჟიმის ვადამდელ საპრეზიდენტო არჩევნებში მონაწილეობის სურვილი 5-მა პირმა გამოთქვა. ერთმა მათაგანმა პრეზიდენტობის კანდიდატისთვის აუცილებელი აფხაზური ენის ცოდნის ტესტი ვერ გაიარა, რის გამოც მას რეგისტრაციაზე უარი ეთქვა.
საბოლოოდ, ოკუპირებული აფხაზეთის დე ფაქტო საპრეზიდენტო არჩევნებში 4 კანდიდატი რჩება - უშიშროების საბჭოს ხელმძღვანელი ასლან ბჟანია, თავდაცვის მინისტრი მერაბ ქიშმარია, ყოფილი ვიცეპრემიერი ბესლან აშბა და ყოფილი შინაგან საქმეთა მინისტრი ლეონიდ ძიაპშბა.
ინფორმაციას სააგენტო იტარ-ტასი ავრცელებს.
აფხაზეთის ოკუპირებული რეჟიმის ყოფილმა პრეზიდენტმა ალექსანდრ ანქვაბმა თანამდებობა ივლისის დასაწყისში დატოვა. მის გადადგომას წინ საპროტესტო აქციები უძღოდა.