რუსეთის ტრანსპორტის სამინისტრომ განაცხადა, რომ 3 მარტს უკრაინამ ხმელთაშუა ზღვაში, მალტის ტერიტორიულ წყლებთან, რუსულ თხევადი ბუნებრივი აირის (LNG) ტანკერზე, Арктик Метагаз-ზე, იერიში მიიტანა.
"მასზე იერიში ლიბიის სანაპიროდან უკრაინის უპილოტო კატერებით მიიტანეს" - აცხადებს სამინისტრო.
რუსეთის ტრანსპორტის სამინისტროში ამბობენ, რომ მალტისა და რუსეთის სამაშველო სამსახურების კოორდინირებული მოქმედებების შედეგად ეკიპაჟის 30-ვე წევრი გადარჩენილია.
მანამდე, Reuters საზღვაო წყაროებზე დაყრდნობით წერდა, რომ რუსეთის დროშის ქვეშ მცურავ თხევადი ბუნებრივი გაზის (LNG) ტანკერს, Арктик Метагаз-ს 3 მარტს ხმელთაშუა ზღვაში ცეცხლი გაუჩნდა.
გამოცემის ცნობით, აშშ-ის, ევროკავშირის და გაერთიანებული სამეფოს მიერ სანქცირებული გემი მალტის სანაპიროსთან ახლოს იწვოდა.
მალტის შეიარაღებულმა ძალებმა გემის წარმომავლობის დაკონკრეტების გარეშე განაცხადეს, რომ მათ 3 მარტს ზღვიდან განგაშის სიგნალი მიიღეს და გემის ეკიპაჟი ლიბიის სიახლოვეს სამაშველო ნავზე იპოვეს.
ერთმა წყარომ Reuters-ს განუცხადა, რომ ხანძარი შესაძლოა უკრაინული საზღვაო დრონის თავდასხმით ყოფილიყო გამოწვეული.
