ერაყის სამთავრობო მედიის ინფორმაციით, ერაყის ქალაქ ელ-კუთის ერთ-ერთ სავაჭრო ცენტრში გაჩენილი მასიური ხანძრის შედეგად 50 ადამიანი დაიღუპა.
სოციალურ მედიაში გავრცელებული ვიდეოებიდან ჩანს, თუ როგორ მოიცვა ხუთსართულიანი შენობა ცეცხლმა ღამის განმავლობაში, რის პარალელურადაც მეხანძრეები მის ჩაქრობას ცდილობდნენ.
INA-ს ინფორმაციით, ხანძრის გაჩენის მიზეზი ჯერჯერობით უცნობია, თუმცა გუბერნატორმა განაცხადა, რომ გამოძიების პირველადი შედეგები 48 საათის განმავლობაში გამოქვეყნდება.
"ჩვენ სავაჭრო ცენტრისა და შენობის მფლობელის წინააღმდეგ სარჩელი შევიტანეთ," ციტირებს გუბერნატორს INA.
ამასთან, AFP-ის კორესპონდენტის ინფორმაციით, სავაჭრო ცენტრი ხუთი დღის წინ გაიხსნა. პირველადი ცნობები კი მიანიშნებს, რომ ხანძარი პირველ სართულზე გაჩნდა.
