ქალთა უფლებების დაცვის ორგანიზაცია საფარი სოციალურ ქსელში განცხადებას ავრცელებს და წერს, რომ ივანიშვილის რეჟიმის ანტიკორუფციული ბიურო ორგანიზაციის დაცვის ქვეშ მყოფი მოქალაქეების პერსონალური ინფორმაციის მიღებას სამართლებრივი საფუძვლის გარეშე ითხოვს.
როგორც ორგანიზაციის განცხადებაშია აღნიშული, საფარი არ აპირებს აღნიშნული მოთხოვნის დაკმაყოფილებას.
"ქართული ორგანიზაცია საფარი უკვე 24 წელია საქართველოში ქალებს უწევს იურიდიულ, ფსიქოლოგიურ და სოციალურ დახმარებას.
ჩვენი ორგანიზაციის იურისტები ყოველწლიურად ათასზე მეტ ქალს უწევენ უფასო სამართლებრივ კონსულტაციას, ეხმარებიან საგამოძიებო უწყებაში, თუ სასამართლოში.
17 ივნისს ივანიშვილ-კუპრაშვილის ბიურომ ანტიკონსტიტუციური რუსული კანონების აღსრულება მურუსიძის სასამართლოს მეშვეობით დაიწყო - ისინი ჩვენგან, უფლებადამცველებისგან, სამართლებრივი საფუძვლების გარეშე ითხოვენ ჩვენი დაცვის ქვეშ მყოფი მოქალაქეების — ძალადობის მსხვერპლი ქალების და ბავშვების პერსონალური ინფორმაციის გადაცემას, კერძოდ, ყველა იმ ადამიანის პირადი ნომრების, სახელების, გვარების, ფოტოსურათების, ფინანსური და საბანკო ინფორმაციისა და ჯანმრთელობის მდგომარეობის ინფორმაციის გადაცემას, ვინც გვენდობოდა და ჩვენი დახმარებით უსარგებლია.
საფარი არ ვაპირებთ ჩვენი დაცვის ქვეშ მყოფი მოქალაქეების ნდობის ღალატს, თუნდაც ამას ჩვენი დევნა და დაპატიმრება მოყვეს.
ჩვენ სხვა სამოქალაქო ორგანიზაციებთან ერთად მივმართავთ სამართლებრივ გზებს ამ ბრძანებების წინააღმდეგ. ჩვენთვის მათი მიზანი ცხადია – ივანიშვილი საქართველოში თავისუფალი სამოქალაქო საზოგადოების განადგურებას ცდილობს, ზუსტად ისე, როგორც ამას 1920-იან წლებში ბოლშევიკები, ბოლო დეკადაში კი – პუტინისა და ლუკაშენკას რეჟიმები აკეთებდნენ.
კიდევ ერთხელ ვაცხადებთ, რომ არ ვაპირებთ რუსული კანონებით ცხოვრებას, საქართველოს ევროპული მომავლის საბოტაჟისადმი შეგუებას და გავაგრძელებთ ბრძოლას ქართველი ხალხის უფლებების დასაცავად". - წერია განცხადებაში.
