Reuters-ის ინფორმაციით, დონალდ ტრამპის ადმინისტრაციამ გადაწყვეტილება მიიღო, აშშ-ს მიერ ახლახან გაუქმებული საგარეო დახმარების სულ მცირე ექვსი პროგრამა აღადგინოს, რომლებიც საგანგებო საკვების მომარაგების უზრუნველყოფას მოიცავს.
გამოცემის წყაროების მიხედვით, ადმინისტრაციამ ასევე აღადგინა დაფინანსება ოთხი პროგრამისთვის, რომელსაც წყნარი ოკეანის რეგიონში მიგრაციის საერთაშორისო ორგანიზაცია (IOM) ატარებს.
გამოცემის წყაროების თანახმად, აშშ-ს საერთაშორისო განვითარების სააგენტოს (USAID) ადმინისტრატორის მოადგილემ, ჯერემი ლევინმა შიდა ელფოსტით თანამშრომლებს მოუწოდა, რამდენიმე პროგრამის გაუქმების გადაწყვეტილება შეეჩერებინათ. ლევინმა განსაკუთრებული ყურადღება გაამახვილა მსოფლიო სასურსათო პროგრამისთვის (WFP) აშშ-ს გრანტების აღდგენაზე, კერძოდ ლიბანში, სირიაში, სომალში, იორდანიაში, ერაყსა და ეკვადორში.
"მაპატიეთ, დაფინანსებასთან დაკავშირებული ამდენი ქაოსური ცვლილება. ამ პროცესში ბევრი მხარეა ჩართული და უკეთ უნდა შევძლოთ ამ ინტერესების დაბალანსება - ეს ჩემი პასუხისმგებლობაა, რომელსაც ჩემ თავზე ვიღებ," - ეწერა ლევინის მიერ გაგზავნილ მეილში.
7 აპრილს ტრამპის ადმინისტრაციამ რამდენიმე ქვეყნისთვის, მათ შორის ავღანეთისთვის, იემენისთვის, სომალსა და სირიისთვის კრიტიკული ჰუმანიტარული დახმარების მიწოდების პროგრამები შეაჩერა. ადამიანის უფლებების დაცვის ორგანიზაცია Stand Up For Aid-ის ინფორმაციით, გასულ შაბათ-კვირას ლევინმა ლიბანში, სირიაში, სომალსა და იორდანიაში მსოფლიო სასურსათო პროგრამის (WFP) კონტრაქტების გაუქმების ბრძანება გასცა. პროგრამების ჯამური ღირებულება კი 463 მილიონ დოლარზე მეტს შეადგენდა.
- USAID რიგ ფუნქციებს 1 ივლისამდე სახდეპს ჩააბარებს, დანარჩენს კი გააჩერებს
-
მოსამართლის გადაწყვეტილებით, DOGE-ს მიერ USAID-ის დახურვის მცდელობა სავარაუდოდ არაკონსტიტუციურია
დონალდ ტრამპმა 20 იანვარს, გაპრეზიდენტების პირველ დღესვე, ხელი მოაწერა აღმასრულებელ ბრძანებას, რომელიც საერთაშორისო განვითარების დახმარების პროგრამების 90 დღის ვადით შეჩერებას გულისხმობდა. ბრძანების საფუძველზე, აშშ-ს სახელმწიფო დეპარტამენტმა, რამდენიმე გამონაკლისის გარდა, ყველა არსებული და ახალი საგარეო დახმარების პროგრამა შეაჩერა.
-
"USAID-ს შეშლილი რადიკალები მართავდნენ" – რას ებრძვის ტრამპის ადმინისტრაცია?
-
რა პროგრამებს მოიცავს USAID-ის დახმარება, რომლის "კიდევ დიდი ხნით გაჩერება" სურს კობახიძეს
თებერვლის დასაწყისში ტრამპმა სახელმწიფო მდივანი, მარკო რუბიო USAID-ის ადმინისტრატორის მოვალეობის შემსრულებლად დანიშნა. ხოლო რუბიომ გაიმეორა ტრამპის ადმინისტრაციის პირობა, რომ USAID-ის ფუნქციები თანხვედრაში უნდა იყოს აშშ-ის საგარეო პოლიტიკასთან.
5 თებერვალს ტრამპის ადმინისტრაციაში ასევე განაცხადეს, რომ საზღვარგარეთ USAID-ის პირდაპირი წესით დასაქმებული ყოველი პირი ანაზღაურებად შვებულებაში გავა, ხოლო უცხოეთში მომუშავე თანამშრომლებს აშშ-ში დააბრუნებენ.
ამასთანავე, გამოცემა New York Times-ის ინფორმაციით, გვატემალაში აშშ-ს საელჩოში შეხვედრისას, რომელსაც ჟურნალისტები არ ესწრებოდნენ, მარკო რუბიომ USAID-ის წარმომადგენლებს განუცხადა, რომ საგარეო დახმარება "მთავრობის ყველაზე არაპოპულარული დანახარჯი იყო" და რომ ამ მიმართულების დაცვა მისთვის სულ უფრო რთულია.
სააგენტოს თანამშრომლებთან საუბრისას მან ხაზი გაუსვა, რომ შეერთებული შტატები არ ტოვებს საგარეო დახმარების პროგრამებს, თუმცა ეს უნდა იყოს ისეთი პროგრამები, რომელთა აუცილებლობის ახსნა და დაცვაც შესაძლებელი იქნება. რუბიოს თქმით, წინააღმდეგ შემთხვევაში საგარეო დახმარებას "საფრთხე ექმნება".
