ტრამპის ადმინისტრაცია 2 აპრილს, რომელსაც პრეზიდენტი დონალდ ტრამპი "განთავისუფლების დღეს" უწოდებს, 15 ქვეყანაზე, მათ შორის, რუსეთზე, თანაბარი საპასუხო ტარიფების დაწესებას გეგმავს. ინფორმაციას The Wall Street Journal ავრცელებს.
ამგვარად ადმინისტრაცია ცვლის სატარიფო სტრატეგიასაც. თავდაპირველი გეგმები მოიცავდა ფართო სექტორული ტარიფების დაწესებას ისეთ ინდუსტრიებზე, როგორებიცაა ავტომობილების წარმოება და ფარმაცევტიკა, თუმცა აშშ-ს თეთრი სახლი, სავარაუდოდ, მათ თანაბარ საპასუხო ტარიფებს დაუწესებს. ტრამპის ტარიფები აშშ-ს შერჩეული სავაჭრო პარტნიორები იქნებიან, რომლებიც ამერიკული პროდუქციის უმსხვილესი იმპორტიორები არიან.
როგორც ტრამპის ადმინისტრაციის ერთ-ერთმა მაღალჩინოსანმა გამოცემასთან საუბრისას დაადასტურა, საპასუხო ტარიფები, რომლებიც სხვა ქვეყნების მიერ ამერიკულ საქონელზე დაწესებული გადასახადების ტოლი იქნება, გეგმისამებრ 2 აპრილს შევა ძალაში, თუმცა დეტალები ჯერ კიდევ დასაზუსტებელია.
WSJ-ს ცნობით, ტარიფების სამიზნე დაახლოებით 15 ქვეყანა იქნება, რომლებსაც აშშ-სთან მუდმივი სავაჭრო დისბალანსი აქვთ. აშშ-ს ფინანსთა მინისტრმა სკოტ ბესენტმა მათ "ბინძური 15" უწოდა. ეს ქვეყნები, მათ შორის, მსხვილი ეკონომიკები, როგორებიცაა ჩინეთი, იაპონია და ევროკავშირი, აშშ-ს საგარეო ვაჭრობის უდიდეს ნაწილს წარმოადგენენ და შესაბამისად, გამოცემის წყაროების თქმით, მათ მაღალი ტარიფები დაუწესდებათ. სხვა ქვეყნებს შესაძლოა, უფრო მცირე მასშტაბის ტარიფები დაუწესდეთ.
სამიზნე ქვეყნები, WSJ-ს ცნობით, შეესაბამება აშშ-ს სავაჭრო წარმომადგენლის მიერ გასულ თვეში გამოქვეყნებულ ფედერალურ შეტყობინებას, რომელიც ყურადღებას ამახვილებდა G20-ის ქვეყნებზე, ავსტრალიაზე, ბრაზილიაზე, იაპონიაზე, ჩინეთზე, კანადაზე, ინდოეთზე, მექსიკაზე, რუსეთზე, სამხრეთ კორეაზე, ვიეტნამზე და სხვებზე.
ტრამპის გუნდს შეუძლია, საგანგებო ეკონომიკური უფლებამოსილებები გამოიყენოს, რათა ეს ტარიფები თითქმის დაუყოვნებლივ ამოქმედდეს 2 აპრილს. ამ დაჩქარებულ გრაფიკს, როგორც გამოცემა წერს, წინ უძღვის მძიმე მოლაპარაკებები აშშ-ს სავაჭრო პარტნიორებთან და ინდუსტრიებთან.
