საუდის არაბეთში აშშ-სა და უკრაინას შორის მიმდინარე მოლაპარაკებების პარალელურად, უკრაინის პრეზიდენტის ოფისის ხელმძღვანელმა, ანდრეი ერმაკმა, სამშვიდობო შეთანხმების სამი პირობა დაასახელა:
- უკრაინას უნდა მისცენ უსაფრთხოების გარანტიები, რომლებიც სამომავლო ცეცხლის შეწყვეტის შეთანხმებისადმი ნდობას გაზრდის;
- ევროპამ უნდა იმოქმედოს ხისტად, გააძლიეროს და გაზარდოს სანქციები რუსეთის წინააღმდეგ;
- ევროპამ უნდა გამოიყენოს გაყინული რუსული აქტივები, რომლებიც შემდგომში უკრაინის მხარდაჭერას და გაძლიერებას მოხმარდება;
უკრაინის პრეზიდენტის ოფისის ხელმძღვანელის თქმით, გასულ კვირას ევროპული კავშირის ყრილობები ადასტურებს იმას, რომ როდესაც ევროპა ერთიანია, შეუძლია აკონტროლოს საკუთარი უსაფრთხოება და ბედი.
დღეს, 11 მარტს, საუდის არაბეთში აშშ-სა და უკრაინის წარმომადგენლების შეხვედრა მიმდინარეობს. ბოლო მონაცემით დასრულდა მოლაპარაკებების პირველი რაუნდი, მხარეები მცირე შესვენების შემდეგ მუშაობას გააგრძელებენ.
