პუტინი კრემლში ოკუპირებული აფხაზეთის ე.წ. არჩეულ პრეზიდენტს შეხვდა

რუსეთის პრეზიდენტი ვლადიმირ პუტინი კრემლში ოკუპირებული აფხაზეთის ე.წ. არჩეულ პრეზიდენტს ბადრა გუნბას შეხვდა, არჩევნებში გამარჯვება მიულოცა და მის მიერ აღებულ შედეგს "კარგი" უწოდა.

"თქვენთვის ახალი არაფერი არ არის: თქვენ დიდხანს მუშაობდით და მანამდე ვიცეპრეზიდენტი იყავით. ვიცი, რომ საარჩევნო კამპანია საკმაოდ მღელვარე იყო ემოციებით. მთავარია, რომ ხალხი მოვიდა, საკუთარი სურვილები და არჩევანი გამოხატა. თქვენ, რა თქმა უნდა, იცით რუსეთსა და აფხაზეთს შორის ურთიერთობის განსაკუთრებული ბუნების შესახებ, იცით იმ პრობლემების შესახებ, რაც არსებობს და გადაჭრა სჭირდება, პრობლემების გადაჭრაზე, რასაც ხალხი ელოდება. ჩვენ ვიმუშავებთ". - უთხრა პუტინმა გუნბას. 

თავის მხრივ, გუნბამ პუტინს "აფხაზი ხალხის მხარდაჭერისთვის" მადლობა გადაუხადა და რუსეთს "მთავარი სტრატეგიული მოკავშირე" უწოდა.

ცნობისთვის, ოკუპირებული აფხაზეთის ე.წ. ცენტრალური საარჩევნო კომისიის თავმჯდომარის, დიმიტრი მარშანის თქმით, 1-ელ მარტს გამართული ე.წ. საპრეზიდენტო არჩევნების მეორე ტურში ბადრა გუნბამ ხმების 54.73% მიიღო, ხოლო ადგურ არძინბამ ხმების 41.54% დააგროვა.

• ოკუპირებული აფხაზეთის ე.წ. საპრეზიდენტო არჩევნებში ბადრა გუნბამ გაიმარჯვა

ოკუპირებული აფხაზეთის შემდეგი ე.წ. პრეზიდენტი კრემლის ფავორიტი მარიონეტი ბადრა გუნბა გახდება. 

თვითგამოცხადებულ რესპუბლიკაში ე.წ. საპრეზიდენტო არჩევნების პირველი ტური 15 თებერვალს გაიმართა. 

არძინბამ ოკუპირებულ აფხაზეთში 15 თებერვალს ჩატარებული ე.წ. საპრეზიდენტო არჩევნების პირველ ტურში ხმების დაახლოებით 36.9% აიღო, ხოლო გუნბამ - 45.8%. 

15 თებერვლის "არჩევნები" ვადამდელი იყო, რადგან 2024 წლის მიწურულს თანამდებობა მარიონეტული რეჟიმის პრეზიდენტმა, ასლან ბჟანიამ დატოვა, ხოლო მისი მოვალეობების შემსრულებელი ბადრა გუნბა გახდა.

• აფხაზეთის ენერგომომარაგების აღდგენა და ავიამიმოსვლა – რას ჰპირდებიან გუნბას მოსკოვში

არალეგიტიმურ არჩევნებში მონაწილე ყველა კანდიდატი ღიად პრორუსია, თუმცა კრემლის ფავორიტი ბჟანიას თანაგუნდელი გუნბაა, რომელიც ბოლო პერიოდში შეხვდა რუსეთის საგარეო საქმეთა მინისტრ სერგეი ლავროვს და ვლადიმირ პუტინის ადმინისტრაციის პირველ მოადგილეს სერგეი კირიენკოს.

• უკრაინის საგარეო: აფხაზეთში ე.წ. არჩევნების ჩატარებას ვგმობთ

• EU: მხარს ვუჭერთ საქართველოს ტერიტორიულ მთლიანობას, არ ვცნობთ აფხაზეთის ე.წ. არჩევნებს

• ლატვია ოკუპირებულ აფხაზეთში ე.წ. ვადამდელი საპრეზიდენტო არჩევნების ჩატარებას გმობს

• შვედეთი ოკუპირებულ აფხაზეთში ჩატარებულ ე.წ. საპრეზიდენტო არჩევნების ლეგიტიმურობას არ აღიარებს