უკრაინის პრეზიდენტმა ვოლოდიმირ ზელენსკიმ თქვა, რომ ამერიკის ლიდერ დონალდ ტრამპს უკრაინასა და რუსეთს შორის ომის დასრულების "ოფიციალური გეგმა" ამ ეტაპზე არ გააჩნია.
მან ასევე აღნიშნა, რომ მათ გუნდებს ამაზე ერთად მოუწევთ მუშაობა: "დარწმუნებული ვარ, რომ ეს გეგმა ჯერ ოფიციალურად არ არსებობს. ის, რაც სხვადასხვა გამოცემებში ვრცელდება, ვფიქრობ (შეიძლება ვცდები, მაგრამ დარწმუნებული ვარ), არ წარმოადგენს პრეზიდენტ ტრამპის ოფიციალურ გეგმას, რადგან მჯერა, რომ ჩვენს გუნდებს ერთად მოუწევთ მუშაობა. შეუძლებელია, რომ იყოს გეგმა, რომელიც სრულიად დამოუკიდებლად შემუშავდა, თუნდაც აშშ-ის მხრიდან. თქვენ მოისმინეთ ინფორმაცია, თითქოს ეს იყო ბატონი კელლოგის მიერ შემოთავაზებული, თუმცა შემდეგ თავად კელლოგმა განაცხადა, რომ მას ამასთან კავშირი არ ჰქონდა და ეს იყო გარე ინფორმაცია. ამ თემაზე ბევრ განცხადებას ვიხილავთ, ზოგიერთი შესაძლოა რეალობას ემთხვეოდეს, მაგრამ დარწმუნებული ვარ, რომ უმეტესობა – არა. ასე რომ, დაველოდოთ ოფიციალურ მოლაპარაკებებს და მათ შედეგებს" – თქვა ზელენსკიმ 6 თებერვალს, ევროპის რეკონსტრუქციისა და განვითარების ბანკის (EBRD) პრეზიდენტ ოდილ რენო-ბასოსთან ერთობლივ ბრიფინგზე.
უკრაინის პრეზიდენტმა აღნიშნა, რომ მას უკვე აქვს თავისი ხედვა ომის დასრულების გეგმის შესახებ და გარკვეული კონკრეტული საკითხები ამერიკულ მხარესთან ჯერ კიდევ ტრამპის ინაუგურაციამდე განიხილებოდა.
