რუსეთ-უკრაინის 2022-25 წლის ომი

ზელენსკის თქმით, აშშ-ს უკრაინისთვის სამხედრო დახმარება არ შეუჩერებია

Kevin Lamarque/REUTERS

უკრაინის პრეზიდენტმა ვოლოდიმირ ზელენსკიმ მოლდოვის პრეზიდენტ მაია სანდუსთან ერთად გამართულ პრესკონფერენციაზე აშშ-ს პრეზიდენტ დონალდ ტრამპის მიერ საგარეო დახმარების 90 დღის ვადით შეჩერების გადაწყვეტილებაზე კომენტარი გააკეთა. ინფორმაციას რადიო თავისუფლება ევროპა ავრცელებს

უკრაინის პრეზიდენტის განცხადებით, აშშ-ს უკრაინისთვის სამხედრო დახმარების გაცემა არ შეუჩერებია.

"ვიცი, რომ მსოფლიოს მასშტაბით ბევრი ინსტიტუტია, რომლებსაც აქამდე აშშ-ს მთავრობა ფინანსურად ეხმარებოდა. მე მხოლოდ იმის შესახებ შემიძლია, ვისაუბრო, თუ რას აღარ მიიღებს უკრაინა და რაზე ვაკეთებ ფოკუსს. მე ვფოკუსირდები სამხედრო დახმარებაზე, რომელიც, მადლობა ღმერთს, არ შეჩერებულა". - თქვა ზელენსკიმ პრესკონფერენციაზე. 

ცნობისთვის, დღეს აშშ-ს სახელმწიფო დეპარტამენტმა, რამდენიმე გამონაკლისის გარდა, საგარეო  დახმარების ყველა არსებული და ახალი პროგრამა შეაჩერა. ამის შესახებ შეტყობინებები უცხო ქვეყნებში აშშ-ს საელჩოებსა და ოფიციალურ პირებს გაეგზავნათ. 

როგორც გამოცემა BBC წერს, ტრამპის განკარგულება, როგორც ჩანს, შეეხება ყოველი ტიპის ფინანსურ მხარდაჭერას, დაწყებული საგარეო განვითარების დახმარებით, დამთავრებული სამხედრო დახმარებით. 

გამონაკლისი, BBC-ის ცნობით, გადაუდებელი სასურსათო დახმარება და ისრაელისა და ეგვიპტისთვის გაცემული სამხედრო დაფინანსებაა. 

ამასთან, 85 დღის განმავლობაში საგარეო დახმარება გადაიხედება, რათა საგარეო პოლიტიკის შესახებ პრეზიდენტ ტრამპის ხედვასთან თანხვედრაში იყოს. 

აშშ-ს სახელმწიფო მდივანს, მარკო რუბიოს აქამდე განუცხადებია, რომ აშშ-ს მიერ სხვა ქვეყნების დაფინანსება მხოლოდ იმ შემთხვევაში უნდა მოხდეს, თუ ეს ხარჯი ამერიკას "უფრო ძლიერ", "დაცულსა" და "უფრო წარმატებულს" ხდის. 

ინფორმაცია იმის შესახებ, რომ  აშშ-ს პრეზიდენტმა დონალდ ტრამპმა 20 იანვარს აღმასრულებელი ბრძანება გამოსცა, რომელიც 90 დღით ყველა სახის საგარეო განვითარების დახმარების შეჩერებასა და გადახედვას ითვალისწინებს, 23 იანვარს გავრცელდა. 

ამ გადაწყვეტილების განზრახვა იმით არის ახსნილი, რომ "აშშ-ს საგარეო დახმარების ინდუსტრია და ბიუროკრატია არ არის თანხვედრაში ამერიკის ინტერესებთან და ხშირ შემთხვევაში ეწინააღმდეგება ამერიკულ ღირებულებებს".

ბრძანების მიხედვით, ტრამპის პოლიტიკა იქნება, რომ არანაირი სახის საგარეო დახმარების გაცემა არ უნდა მოხდეს ისეთი გზით, რომელიც სრულად არ არის თანხვედრაში აშშ-ს პრეზიდენტის საგარეო პოლიტიკასთან.

პროგრამების გადახედვისა და 90-დღიანი პერიოდის გასვლის შემდეგ, თუმცა, გამონაკლის შემთხვევებში მანამდეც, სახელმწიფო მდივანი, აშშ-ს პრეზიდენტთან არსებულ ადმინისტრაციულ-საბიუჯეტო სამმართველოსთან კონსულტაციის გავლის შემდეგ, გადაწყვეტს, შეცვალოს თუ იგივე ფორმით გააგრძელოს ეს პროგრამები.

ამასთანავე, ტრამპის ბრძანების მიხედვით, ნებისმიერ ახალ საგარეო დახმარების პროგრამაზე აშშ-ს სახელმწიფო მდივნის ან მის მიერ დანიშნული პირის თანხმობა იქნება საჭირო.

კომენტარები