ივანიშვილის რეჟიმი 2003-12 წლებში მოქმედი ხელისუფლებისა და პოლიტიკური თანამდებობის პირების საქმიანების შემსწავლელ საპარლამენტო კომისიას ქმნის - განცხადება მამუკა მდინარაძემ გააკეთა.
რეჟიმის განცხადებით, კომისიის დასკვნა, მოგვიანებით, "დამნაშავეების დასჯის მიზნით", პროკურატურას გადაეცემა. რეჟიმი აპირებს გამოკითხოს ყველა, ვინც 2003-13 წლებში თანამდებობაზე იყო.
"საგაზაფხულო სესიის პირველი კვირაში შეიქმნება 2003-12 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისია, რომელიც 6 თვის განმავლობაში იმუშავებს და მოამზადებს დასკვნას, რომელსაც საქართველოს პარლამენტი განიხილავს და დაამტკიცებს სექტემბრის პირველი სასესიო კვირისათვის.
დასკვნაში აისახება რეკომენდაციები დამნაშავეთა მიმართ საქართველოს კონსტიტუციით გათვალისწინებული პოლიტიკური და სამართლებრივი რეაგირების ზომების შესახებ.
საქართველოს პარლამენტის მიერ დამტკიცებული დასკვნა გადაეცემა საქართველოს პროკურატურას და სხვა შესაბამის ორგანოების საქართველოს კანონმდებლობის შესაბამისად შემდგომი ზომების მიღების და დამნაშავეთა დასჯის უზრუნველყოფის მიზნით.
სპეკულაციების გამოსარიცხად, იმ თავითვე ხაზგასმით ვაცხადებთ, 2008 წლის ომის საქმეზე გამოძიების ადრესატები არ იქნებიან სამხედრო მეთაურები და ჯარისკაცები.
დროებითი საგამოძიებო კომისია დაიბარებს და გამოჰკითხავს რეჟიმის თანამდებობის პირებს, ასევე ნებისმიერ სხვა პირს, რომელსაც შესაძლოა ბრალი მიუძღოდეს რეჟიმის მიერ ჩადენილ დანაშაულებში, ან რომელიც შეიძლება ფლობდეს ღირებულ ინფორმაციას, აღნიშნული დანაშაულების შესახებ" - თქვა მამუკა მდინარაძემ